Sang Nobiembre 28, 2020, ginpagua ang kompleto nga Bag-ong Kalibutan nga Badbad sang Balaan nga Kasulatan sa naimprinta kag electronic nga pormat sini sa apat ka tumandok nga lenguahe sa Indonesia: Batak Karo, Batak Toba, Javanese, kag Nias. Ini nga mga Biblia ginpagua ni Brother Geoffrey Jackson, nga miembro sang Nagadumala nga Hubon, paagi sa narekord nga pamulongpulong nga gin-stream sa tanan nga kongregasyon sa madamo nga mga isla sang Indonesia. Mga 41,265 ang nakatan-aw sini nga programa. Ginpahibalo man ni Brother Jackson nga sa indi madugay ipagua man ang electronic nga pormat sang Bag-ong Kalibutan nga Badbad Sang Cristianong Griegong Kasulatan sa Sunda nga lenguahe.

Ini nga mga translation sang Biblia nahimo paagi sa wala untat nga pagpangabudlay sang mga translator nga nagtrabaho sa sini nga proyekto sa sulod sang sobra tatlo ka tuig kag tunga. Sobra 100 ka milyon ka tawo ang makahibalo maghambal sang indi magnubo sa isa sa sining apat ka tumandok nga lenguahe sang ginpagua nga mga translation. Dugang pa, sobra 2,600 ka manugbantala ang nagagamit sini nga mga lenguahe sa ministeryo kag sa mga miting sa kongregasyon.

Subong, indi na pamilyar sa kalabanan nga tawo ang spelling kag mga tinaga nga makita sa daan nga mga translation sang Biblia. Ang isa ka translator nagsiling: “Ining moderno kag kompleto nga Bag-ong Kalibutan nga Badbad sang Balaan nga Kasulatan mas nga nagkumbinsi pa gid sa akon nga gusto ni Jehova nga Dios nga mabatian sang tanan ang iya Pulong sa lenguahe nga mahapos intiendihon kag nagalab-ot sa tagipusuon.”

Si Daniel Purnomo, nga miembro sang Komite sang Sanga sa Indonesia, nagsiling: “Mabudlay gid ang kabuhi subong, ilabi na kay may COVID-19 nga pandemic. Ang aton mga kauturan nga nagahambal sini nga mga lenguahe nalipay gid nga nakabaton sila sini nga regalo sa insakto gid nga tion.”

Nagapasalamat kita nga sa bulig ni Jehova nabaton sang mas madamo nga tawo ining importante gid nga regalo nga amo ang iya Pulong. Nagalaum kami nga mas madamo pa nga tawo nga nagahambal sining tumandok nga mga lenguahe ang makabenepisyo sa mga ginatudlo sang Biblia.—Santiago 1:17.