Sang Disiembre 31, 2019, ginabulubanta nga 100 ka balay sang aton mga kauturan ang ginbahaan sang nagbundak ang halos 38 ka sentimetro (15 ka pulgada) nga ulan sa Jakarta, Indonesia. Sa iban nga balay, nakalab-ot sa 1.5 metros (5 ka pie) ang kadalumon sang tubig.

Bisan pa wala sing isa sa mga kauturan ang napatay ukon nasamaran bangod sang baha, madamo sa mga kauturan ang temporaryo nga nagbiya sang ila mga balay, samtang ang iban naman nga indi makahalin sa ila balay nangita na lang sang ila mapuestuhan para indi sila malab-ot sang tubig. May pila man ka bilding nga ginamitingan ang ginbahaan. Ang mga gulang didto nag-organisar sang bulig kag naghatag sang mga kinahanglanon pareho sang pagkaon kag tubig. Ginbisitahan man sang mga manugtatap sang sirkito ang mga ginbahaan para palig-unon sila paagi sa Biblia. Nagporma man sing duha ka Disaster Relief Committee para usisaon kon bala kinahanglan pa sang dugang nga bulig.

Wala napauntat sang baha ang espirituwal nga hilikuton sang mga kauturan, bisan pa nga ang iban nga pamilya kinahanglan maglusong sa baha para makatambong sa midweek meeting. Si Brother Daniel Purnomo, nga miembro sang Komite sang Sanga sa Indonesia, nagsiling: “Bisan pa nga amo ini ang pinakagrabe nga baha nga natabo sa Jakarta sa sulod sang nagligad nga tinuig, wala sini mapaluya ang mga kauturan, kundi napahulag pa gani sila nga magbuligay kag magpakita sang Cristianong gugma.”

Ginahulat na gid naton nga mag-abot ang tion nga wala na sing mga kalamidad nga magahalit sa aton.—Marcos 4:39.