Sang Abril 4, 2021, daku gid ang nangin halit sang Bagyo Seroja sa Indonesia. Bangod sini, may ginhimo nga pagbulig para kay-uhon ang mga balay sang kauturan. Nagpabakod gid ini sa gugma sang mga kauturan kag madamo sa nakakita sini ang nagdayaw kay Jehova.

Naguba ang balay ni Sister Ela Ludjipau, isa ka nagasolo nga iloy. Sa pagdumala sang Disaster Relief Committee (DRC), ginkay-o ang iya naguba nga balay. Nagsiling sia: “Bisan pa kami lang sang akon mga bata sa balay, wala gid ’ko nagbatyag nga nagaisahanon ako, kay man ginbuligan gid kami sang mga kauturan.” Ang isa pa ka sister nga si Yuliana Baunsele, nagsiling: “Pagkatapos sang kalamidad, ara gid dayon ang mga utod para magbulig. Bangod sini, nangin kumbinsido pa gid ako nga ginaatipan ako ni Jehova.”

Si Brother Dicky Thome, isa ka miembro sang DRC, nagsiling: “Makalilipay gid nga makita kon paano ginabuligan ni Jehova ang mga kauturan nga nagakinahanglan. Napalig-on gid kami kay grabe gid ang pagpasalamat sang mga kauturan sa pagbulig sa ila. Nagbakod pa gid ang amon pagtuo sang nakita namon nga nagasalig gid sila nga proteksionan kag buligan sila ni Jehova.”

Natalupangdan man sang mga tawo ang aton gugma sa aton mga kauturan. Si Brother Marsel Banunaek kag ang iya pamilya nagaistar sa lugar nga wala nagaintiendihanay ang mga tribo. Indi gid gusto sang ila mga kaingod ang mga Saksi ni Jehova. Pero si Brother Banunaek nagsiling nga sang nakita sang ila mga kaingod nga nagabuligay ang aton mga kauturan bisan indi sila palareho sang tribo, ang pila sa ila nagsiling: “Nagsala gid kita sa pagtan-aw naton sa mga Saksi ni Jehova.” Si Brother Banunaek nagsiling: “Nagdayaw gid ang amon mga kaingod sang nakita nila nga nagapalanggaanay kita kag nahiusa. Isa pa, nakita man sang amon mga paryente ang kaayo sang mga kauturan. Subong, nagapamangkot na sila parte sa aton mga pagpati. Nagapasalamat gid kami sa aton mga kauturan!”

Si Mrs. Yosi Duli Ottu, isa ka opisyal sang gobierno, nagsiling nga “dalayawon” gid ang pagbulig kag pagsunod sang DRC sa mga safety protocol nga ginpatuman bangod sa COVID-19. Amo ini ang iya ginsiling parte sa DRC: “Nagadayaw gid kami sa inyo ginahimo para sa inyo mga abyan. Kon may matabo gani nga kalamidad, kadasig sa inyo magbulig sa ila. Organisado man ang inyo pagbulig, kag kompleto gid ang inyo mga gamit sa pagbulig.”

Huo, posible maguba ang mga propiedad kon may kalamidad, pero indi gid sini maguba ang aton gugma kag paghiusa bilang mga Cristiano. Makalilipay gid nga makita kon paano ang “maayong mga buhat” nagpabakod sang aton gugma para sa isa kag isa kag nagpahulag sa iban nga “maghimaya” kay Jehova.—Mateo 5:16.