Sang Biernes, Septiembre 28, 2018, ginhalitan sang 7.5 nga kabaskugon sang linog ang isla sang Indonesia nga Sulawesi. Ang linog, kag ang tsunami pagkatapos sini, nagpatay sang sobra 1,300 ka tawo, nga ang kalabanan sa ila nagaistar sa siudad sang Palu sa Central Sulawesi.

Ang branch office sa Indonesia, nga ara sa Jakarta, nagreport nga wala sing napatay sa tanan nga 80 ka manugbantala sa apektado nga lugar. May pila lang ka manugbantala nga nasamaran kag kinahanglan dalhon sa ospital. Ang balay sang isa ka utod nawasak bangod sa linog kag naguba man ang balay sang iban nga Saksi. Ang bilding nga ginagamit sang Palu Congregation sa ila mga miting naguba man.

Ang Disaster Relief Desk sa branch office nagabuligay upod sa manugtatap sang sirkito kag sa kaingod nga mga kongregasyon sa paghatag sing bulig. Diutay ang pagkaon, tubig, kag iban pa nga kinahanglanon sang mga kauturan sa apektado nga mga lugar, gani gin-asayn sang branch ang tatlo ka kongregasyon nga maghatag sini nga mga kinahanglanon sang mga kauturan sa Palu. Ang mga gulang sa sini nga lugar nagatatap sa espirituwal, emosyonal, kag pisikal nga kinahanglanon sang mga utod. Ang miembro sang Branch Committee, overseer sang Local Design/Construction Department, kag ang manugtatap sang sirkito sa sini nga lugar nagbisita man sa apektado nga mga manugbantala para paumpawan kag palig-unon sila.

Ginapangamuyo gid naton ang aton mga kauturan sa Indonesia, kag nakahibalo kita nga si Jehova padayon nga mangin ila “dalangpan kag kusog” sa sining tion sang kabudlayan.—Salmo 46:1.