Israel kag Palestinian Territories

• Sang Mayo 10, 2021, may natabo nga inaway sa Israel kag sa Palestinian Territories, kag madamo ang napatay

• Madamo nga mga balay kag mga negosyo ang nagkalaguba sa mga banwa sa Israel diin nagaistar ang mga Judiyo kag mga Arabo

• Wala sing nasamaran sa sobra 2,000 ka manugbantala sa Israel kag sa Palestinian Territories

• 73 ka manugbantala ang nagbakwit, pati ang 15 ka special full-time servant nga ara sa field. Temporaryo man nga nag-updanay ang 13 ka Bethelite sa mga apartment nga may bomb shelter

• 6 ka balay ang may gamay nga guba

• Ginadumalahan sang isa ka Disaster Relief Committee ang pagbulig upod sa mga manugtatap sang sirkito kag mga gulang

• Ginapalig-on man paagi sa Biblia sang mga manugtatap sang sirkito upod sa mga gulang ang mga kauturan nga naapektuhan

• Ang tanan nga pagbulig ginahimo samtang ginasunod ang mga safety protocol nga ginapatuman bangod sa COVID-19

Bangod ang tanan nga miting subong ginahimo na paagi sa videoconference, padayon nga nahiwat nila ang ila mga miting sa kongregasyon. Sang Mayo 15, natan-aw man sang mga kauturan ang livestream sang ila sirkito nga asembleya paagi sa JW Stream–Studio. Ang programa sa hapon tatlo ka beses nga nag-untat bangod sa alarm nga ginapatunog sang mga awtoridad. Ini nga alarm nagapahibalo sa mga kauturan nga magpanago sa lugar nga indi sila maano, pareho abi sa idalom sang hagdan ukon sa bomb shelter. Bisan pa may inaway, 804 ka manugbantala ang nag-connect sa asembleya sa Hebreo nga lenguahe. Dugang pa, 297 ka manugbantala ang nag-connect sa ila asembleya sa Tagalog. Sa Mayo 22, lima ka Arabo nga kongregasyon pa gid sa Israel kag sa Palestinian Territories ang magahiwat man sang ila sirkito nga asembleya.

Ang aton mga kauturan nga naapektuhan sining mabudlay nga sitwasyon padayon nga nagasalig kay Jehova bilang ila dalangpan.—Salmo 91:1, 2, 5.