Sugod sang Mayo 10 asta 19, ang mga Saksi ni Jehova sa Israel nagpanikasog gid nga mag-organisar sing mas madamo nga pagpanaksi sa publiko sa Tel Aviv. Ginhimo nila ini bangod sa pag-abot sang madamo nga turista para magtambong sa sarisari nga cultural event sa siudad. Halimbawa, sugod sang Mayo 14 asta 18, ginhiwat sa Tel Aviv ang Eurovision Song Contest, nga isa ka kompetisyon sa musika, nga gintambungan sang mga napulo ka libo ka turista.

Si Brother Gennadi Korobov, nga nagbulig sa pag-organisar sang publiko nga pagpanaksi, nagkomento: “Sang nabalitaan namon nga linibo ka bisita ang magaabot sa Tel Aviv para sa music event, nakita namon nga daku ini nga kahigayunan para mas mapasangkad ang amon publiko nga pagpanaksi. Nalipay gid kami nga may 168 ka manugbantala halin sa 22 ka kongregasyon sa bilog nga Israel ang nagboluntaryo.”

Ang mga kauturan nagplastar sing mga cart sang literatura sa walo ka lugar sugod sa 9:00 a.m. asta 9:00 p.m. kada adlaw. Para mabantalaan ang mga turista halin sa sarisari nga lugar sa kalibutan, ang mga cart may literatura sa napulo ka lenguahe: Arabic, Chinese, English, French, German, Hebrew, Italian, Japanese, Russian, kag Spanish.

Nagasalig kita nga may maayo gid nga mga resulta ang pagpasangkad sang hilikuton sa Israel. Ini nga panikasog dugang nga pamatuod nga ang katawhan ni Jehova nagadayaw sa iya “sa tanan nga tion.”—Salmo 34:1, 2.