Ang mga pasilidad sang branch sa Italy isaylo halin sa Rome pakadto sa mga siudad sang Bologna kag Imola. Ang Bologna mga 370 ka kilometro sa aminhan sang Rome, kag ang Imola naman mga 48 ka kilometro halin sa Bologna. Nagsugod na ang renovation sa siam ka panalgan nga bilding sa Bologna nga amo ang mangin opisina sang branch. Sang 2018, sobra 60 ka boluntaryo halin sa Bethel nga naasayn sa translation kag sa iban pa nga departamento ang nagsugod na sa pag-obra sa isa ka bilding nga bag-o lang na-renovate sa Imola.

Para may istaran ang mga Bethelite nga masaylo sa Bologna, may ginapatindog subong nga isa ka bilding nga may pito ka panalgan kag may tatlo ka underground level parking. Mga isa ka kilometro kag tunga ang kalayuon sini sa bilding sang mga opisina. Butangan pa sang dugang nga mga ilistaran sa sini man nga lugar.

Sang 1948, ginbakal sang mga Saksi ni Jehova ang una nga pasilidad sang branch nila sa Rome kag nagsaylo diri halin sa daan nga pasilidad sa Milan. Sugod sadto, nag-uswag gid ang hilikuton sa Italy. Sang tungatunga sang dekada ’40, wala pa 200 ang manugbantala sa Italy. Subong, sobra na 250,000 ang manugbantala, ang pinakamadamo sa tanan nga branch sa Europe. Samtang nagadamo ang mga manugbantala, nagadamo man ang mga boluntaryo sa Bethel kag sa iban pa nga pasilidad sang branch. Sa peak sini sang 2006, ang branch office sa Italy may 99 ka bilding. Kon matapos na ang pagsaylo sa Bologna, mabuhinan ang miembro sang pamilya Bethel sa branch didto kag mangin lima na lang ang mga bilding sini.

Ginapangamuyo naton nga padayon nga pakamaayuhon ni Jehova ini nga proyekto kag kabay nga ining bag-o nga mga pasilidad makabulig sa hilikuton sa Italy, nga isa ka kaumhan nga ‘maputi kag alanihon na.’—Juan 4:35.