Sang Disiembre 17, 2019, ginbaliskad sang Court of Appeals sa Rome ang desisyon sang isa ka juvenile court sa sini nga pungsod. Ang juvenile court nagdesisyon nga kuhaon sa isa ka sister ang kinamatarong nga magdesisyon para sa iya bata bangod wala sia nagsugot nga tughungan ini sang dugo. Ginbalik sang Court of Appeals ang kinamatarong sang sister kag nagsiling ini nga wala sing nahimo nga krimen ang sister. Ini nga desisyon importante gid kay mangin basihan ini sang mga kaso sa ulihi. Makabulig ini para siguraduhon nga indi makuha ang kinamatarong sang Saksi nga mga ginikanan bangod lamang indi sila magsugot nga tughungan sang dugo ang ila bata.

Nagsugod ini nga kaso pagkatapos maaksidente sa salakyan ang isa naton ka sister kag ang iya dies anyos nga bata nga lalaki. Nasamaran ang bata kag gindala sa ospital. Pagligad sang tatlo ka adlaw, nagdesisyon ang mga doktor nga operahan sia. Nagpasugot ang sister nga operahan ang iya bata kag himuon ang iban pa nga paagi sang pagbulong, pero ginpaathag niya nga indi sia magsugot nga tughungan ini sang dugo. Bisan pa nga indi man gid delikado ang kahimtangan sang bata, nagsulat ang ospital sa isa ka piskal. Ang ospital nagsiling nga wala ginaatipan sang sister ang iya bata bangod sang iya relihioso nga mga pagpati. Gani ginpangabay sang ospital ang piskal nga magkuha sing pahanugot para kon kinahanglanon matughungan sang mga doktor sang dugo ang bata. Gin-akusar sang piskal ang sister nga wala niya ginahimo ang pinakamaayo para sa iya bata kag ginpangabay ang juvenile court nga kuhaon ang iya kinamatarong sa pagdesisyon para sa iya bata. Ginpaboran sang juvenile court ang pangabay sang piskal bisan pa ini nga korte wala sing kinamatarong sa paghimo sina nga desisyon. Gani nag-apelar ang aton sister sa Court of Appeals.

Ang Court of Appeals nagsiling nga ang aton sister isa ka maayo nga iloy nga nagaatipan sa iya bata. Suno sa korte, “indi husto nga magsiling nga wala niya ginaatipan ang iya bata bangod lamang ginasunod niya ang iya relihioso nga mga pagpati kag wala niya gintugutan nga patughungan ang iya bata.” Ginbalik sang Court of Appeals ang kinamatarong sang sister sa pagdesisyon para sa iya bata kag nagsiling ini nga ilegal ang ginhimo sang juvenile court.

Si Nicola Colaianni, nga anay councillor sa Supreme Court of Cassation kag propesor sang ecclesiastical law sa University of Bari, nagsiling: “Nagaugyon ako sa desisyon sang Court of Appeals. Daw indi ako makapati nga may mga desisyon nga pareho sang desisyon sang juvenile court. Maathag nga mabudlay gid para sa madamo nga makatigayon sang matuod nga kahilwayan sa relihion pero mas mabudlay pa gid ini para sa mga Saksi ni Jehova.”

Si Brother Christian Di Blasio, nga nagaalagad sa Public Information Desk sa Italy, nagsiling: “Nagapasalamat kita sa Court of Appeals sa Rome nga ginbaliskad sini ang isa ka desisyon nga naimpluwensiahan sang dumot sa relihion. Ginapalangga gid sang mga Saksi ni Jehova ang ila kabataan kag ginapasalamatan gid naton ang madamo nga doktor nga nagahatag sing pinakamaayo nga pagbulong kag nagatahod sang aton Cristianong konsiensia.”

Ang desisyon sang Court of Appeals maathag nga nagapakita sang kinamatarong sang aton mga kauturan nga maghimo sing maalamon nga desisyon parte sa pagpabulong sang ila kabataan. Ginapasalamatan naton ang aton Dios, nga si Jehova, sa aton pagdaug sa korte kay makabulig gid ini sa aton mga kauturan sa ila pagdesisyon parte sa pagpabulong nga wala nagalapas sa ila Cristianong konsiensia.—Salmo 37:28.