Ang Court of Appeals sa Milan sa Italy, nagdesisyon sining karon lang pabor sa isa ka mag-asawa nga Saksi ni Jehova sa isa ka kaso parte sa pagpabulong sa ila bata. Sa sini nga desisyon, mas nag-athag nga indi makuestyon sang mga korte ang ikasarang sang mga ginikanan nga magdesisyon bangod lamang indi sila magbaton sang paagi sang pagbulong nga nagagamit sing dugo. Suno sa korte may kinamatarong ang mga ginikanan nga indi magbaton sang gindonar nga dugo para sa ila bata bangod sa ila relihioso nga pagpati.

Sang Septiembre 2019, gindala sang isa ka Saksi nga mag-asawa ang ila pulo ka bulan nga bata nga babayi sa ospital kay nahulog ini. Suno sa mga doktor kinahanglan operahan ang bata para mabulong ang halit sa iya ulo. Madinalag-on nga nahimo sang mga doktor ang operasyon nga wala nagtughong sing dugo.

Sang ulihi, bisan pa nga nagapaayo na ang bata kag luwas na sa katalagman, ang isa ka doktor nagpangayo sing pahanugot sa mga ginikanan nga tughungan sing dugo ang ila bata bilang “bulig nga pagbulong.” Pero nagsiling ang mga ginikanan nga mapasugot lang sila kon ang pagbulong wala nagagamit sing dugo.

Imbes nga sundon ang pangabay sang mga ginikanan, nagreport ang doktor sa mga pulis kag sa piskal. Nagkuha sing court order ang piskal sa family court. Bangod sa mando sang korte, nalimitehan ang kinamatarong sang mga ginikanan kag ang awtoridad sa pagpabulong sa ila bata ginhatag sa direktor sang ospital. Pero, wala man natughungan ang bata kay para sa mga doktor indi ini kinahanglan.

Madamo nga mga estasyon sang TV kag newspaper ang nagbalita sini nga hitabo sa Italy. Madamo pa gani nga mga reporter ang sayop nga nagbalita nga naluwas ang kabuhi sang bata nga babayi bangod sa pagmando sang korte nga tughungan ini sing dugo.

Sang Septiembre 10, 2020, ginkanselar sang Court of Appeals ang desisyon sang family court nga limitahan ang kinamatarong sang mga ginikanan. Suno sa Court of Appeals, ang family court wala dapat naghatag sing court order kag wala ini sing awtoridad nga magdesisyon sa sini nga kaso.

Sa desisyon sini, ang Milan Court of Appeals, nagsiling: “Ang pagpangindi sang mga ginikanan sa pagtughong sing dugo bangod sa ila relihioso nga pagpati indi pamatuod nga malain sila nga mga ginikanan kag nga dapat sila kuhaan sang kinamatarong nga magdesisyon para sa ila kabataan.” Sang nagligad lang nga tuig, tatlo ka Court of Appeals sa Italy ang nagsuporta sa kinamatarong sang Saksi nga mga ginikanan nga magpangabay sang pagbulong nga wala nagagamit sing dugo para sa ila kabataan.

Importante nga maintiendihan sang mga hukmanan kag mga doktor nga ang mga Saksi ni Jehova wala nagasalig sa milagro kag wala man sila nagakontra sa pagpabulong. Ang matuod, nagapangita sila sang pinakamaayo nga pagbulong sa moderno nga mga ospital, nga eksperiensiado kag may nagakaigo nga mga kagamitan para mabulong sila sa paagi nga wala nagalapas sa ila relihioso nga mga pagpati. Ang ila lang ginapangabay amo nga indi maggamit ang mga doktor sing dugo sa pagbulong. Madamo nga respetado nga mga doktor sa dalagku nga mga ospital ang nagbaton sini nga pangabay kag nahimo nila ang pinakamaayo nga pagbulong nga wala nagagamit sing dugo.

Nagapasalamat gid kita nga ining mga desisyon sini nga mga korte nagasuporta sa aton mga kauturan sa ila determinasyon nga magpili sing nagakaigo nga pagbulong para sa ila kabataan base sa ila relihioso nga pagpati.—Binuhatan 15:29.