Isa ka importante nga desisyon parte sa kustodiya sang bata kag kinamatarong sang ginikanan ang ginpapanaug sang Supreme Court of Cassation sa Rome sang Agosto 30, 2019. Ini nga desisyon sang pinakamataas nga korte sang pungsod, nagsuporta sa kinamatarong sang isa ka iloy, nga isa ka Saksi ni Jehova, nga tudluan ang iya menor de edad nga bata parte sa iya relihion.

Ang amay nga indi Saksi, nga bulag na sa iloy sang bata, nagainsister nga dapat iya lang relihion ang itudlo sa bata. Duha ka lower court ang nagdesisyon pabor sa amay, nga nagasiling nga ang pagtudlo sing iban nga relihion sa bata, mahimo “makapagamo sang iya pensar.” Bangod sini nga mga desisyon, indi matudluan sang iloy ang bata parte sa iya relihioso nga mga pagpati, bisan pa kinamatarong niya ini. Ginbaliskad sang Supreme Court ang desisyon sang mga lower court kag ginpat-od sini nga ang mga ginikanan sang bata pareho nga may kinamatarong nga magtudlo sa iya parte sa relihion. Ang Korte nagsiling man nga ang tanan nga relihion “may patas nga kinamatarong sa mata sang kasuguan” kag ginkondenar sini ang “pagpasulabi” nga ginhimo sang mga lower court batok sa mga Saksi ni Jehova. Ginsiling man sini nga desisyon nga kon indi magsugtanay ang mga ginikanan parte sa pagtudlo sang relihion sa ila mga bata, wala sing kinamatarong ang hukom nga magdesisyon kon ano nga relihion ang mas maayo para sa bata.

Nagalaum kita nga ini nga desisyon sang Korte mangin basihan sang pagdesisyon sa mga kaso nga may labot sa kustodiya sa bata sa sini nga pungsod. Pat-od gid nga makabenepisyo sa sini ang mga ginikanan nga nagapanikasog nga padakuon ang ila kabataan “sa disiplina kag laygay ni Jehova.”—Efeso 6:4.