Ang Italy isa sa mga pungsod nga naapektuhan gid sing grabe sang COVID-19 nga pandemic. Gani ang Nagadumala nga Hubon naghatag sing direksion sa branch sa Italy para maatipan ang kinahanglanon sang aton mga kauturan kag mapalig-on sila.

Tatlo ka Disaster Relief Committee (DRC) ang nagaatipan sa mga kinahanglanon sang aton kauturan sa naaminhan, sentral, kag nabagatnan nga bahin sang Italy. Ginatinguhaan gid sang DRC nga mabal-an ang mga kinahanglanon sang apektado nga mga kauturan. Ginakontak nila pirme ang mga manugtatap sang sirkito, nga amo ang regular nga nagapakig-istorya sa mga gulang.

Indi lang praktikal nga bulig ang ginahatag sang mga gulang, kundi ginapalig-on man nila ang mga kauturan nga padayon nga magbantala kag magtambong sa mga miting. Si Brother Villiam Boselli, nga manugtatap sang sirkito nga nagaalagad malapit sa Milan, nga isa sa mga siudad nga una nga naapektuhan sang pandemic, nagsiling: “Bisan ara lang ang tanan nga kauturan sa ila balay, pirme sila nagaistoryahanay. Nagakonek man sila sa mga miting paagi sa videoconference, gani makakomento sila kag mapalig-on nila ang isa kag isa. Bisan ang tigulang na nga mga utod nagakonek man paagi sa videoconference kag nagabenepisyo gid sa sini. Masiling ko nga mas nahiusa ang mga kongregasyon subong!”

Madamo man nga mga indi Saksi ang nagatan-aw sang mga miting upod sa ila Saksi nga mga kapamilya. Ang isa ka sister nagsiling: “Ang akon bana wala gid nagaupod sa mga miting sadto. Pero subong nga matan-aw na ang mga miting sa amon balay, nanamian sia mag-attend pirme!”

Ginatinguhaan man sang mga kauturan nga makapanaksi sa tanan nga kahigayunan. Halimbawa, samtang nagadrayb ang isa ka sister pakadto sa balay sang isa ka tigulang nga sister para magdul-ong sang wheelchair, ginpadulog sia sang tatlo ka pulis sa checkpoint. Ginpaathag sang sister nga ginabuligan niya ang isa ka tigulang kag ginpakita niya ang iya permit sa pagbiyahe. Dayon ginhatagan niya sila sang mga tract nga Ano Ayhan ang Matabo sa Palaabuton? kag Madula Pa Ayhan ang Pag-antos? Ginbaton ini sang mga pulis. Pagbalik sang sister pagkatapos niya madul-ong ang wheelchair, ginpadulog sia liwat sang mga pulis. Ginpasalamatan nila sia kag ginpamangkot parte sa paglaum nga ginasugid sang Biblia. Ginpaentra man nila sa ila pag-istoryahanay ang duha pa gid nila ka upod nga pulis. Ginpakita sa ila sang sister ang jw.org. Ang isa ka pulis nagsiling, “Salamat gid ma’am. Nalipay gid kami sa ginsugid mo sa amon!”

Si Brother Boselli nagsiling: “Bisan ako ang dapat magpalig-on kag magpaumpaw sa mga kauturan, ako pa ang napalig-on sang ila katutom kag determinasyon nga magpadayon sa pag-alagad. Dalayawon gid ang kabakod sang ila gugma kay Jehova kag natandog gid ako sa sini. Kinahanglan gid naton ang aton mga kauturan. Importante gid sila nga regalo halin kay Jehova!”

Maathag nga bisan pa mabudlay ang sitwasyon, ang aton mga kauturan nagapabilin nga mabakod sa espirituwal kag wala “malingkang bangod sini nga mga kapipit-an.”—1 Tesalonica 3:2, 3.