Bisan pa sang mga kabudlayan bangod sa ekonomiya kag sa pandemic, ang proyekto nga pagsaylo sang branch sa Italy pakadto sa siudad sang Bologna nagapadayon gihapon. Sang Septiembre 5, 2020, natapos ang una nga residential building, amo nga isa gid ini ka importante nga adlaw para sa sini nga proyekto. Ang bag-o nga branch nakaiskedyul nga mahuman sa katapusan sang 2023.

Ining proyekto para sa bag-o nga branch ginadumalahan sang lima ka brother sa Construction Project Committee (CPC). Isa ka kompanya ang ginbayaran para magdesinyo kag magpatindog sining residential building, kag nagsugod sila sa pagtrabaho sang Septiembre 2018.

Sang 2019, bangod sa pagnubo sang ekonomiya, madamo nga kompanya ang naapektuhan. Gani, kinahanglan sini nga kompanya nga untaton anay ang ila obra para maorganisar liwat ang ila kompanya. Maayo lang kay nahuman na ang structure sang bilding gani dali lang nga nauntat ang obra.

Sang magsugod ang 2019, gin-igo sang COVID-19 nga pandemic ang naaminhan sang Italy, pati ang Bologna. Ginpauntat sang mga awtoridad sa lokal kag sa bilog nga pungsod ang madamo nga obra sa siudad, pati ang mga konstruksion. Pero pagligad sang isa ka bulan, ginbuhinan sang mga awtoridad ang mga restriksion. Gani puede na padayunon ang konstruksion basta ginasunod ang mga pagsulundan sang gobierno kag sang aton organisasyon parte sa paghalong bangod sa COVID-19.

Si Brother Paulo Comparato, nga miembro sang CPC, nagsiling: “Ginapasalamatan gid namon si Jehova kay nahuman ini nga bilding. Kon wala ang bulig sang iya espiritu, indi gid namon masarangan ang mga kabudlayan nga amon gin-atubang.”

Si Mrs. Cristina Dallacasa, nga tsirman sang kompanya nga ginbayaran para magpatindog, nagsiling: “Nalipay gid kami nga kami ang ginpili sang mga Saksi ni Jehova nga magpatindog sang isa sa ila pinakaimportante nga mga bilding sa Italy. Nagabuligay gid kami bilang team, kag bangod sini nasolbar namon ang tanan nga mga problema. Importante gid sa mga Saksi ni Jehova ang ila mga proyekto, labi na ang safety sang mga nagaobra sa site.” Nagsiling pa gid sia: “Para sa akon, nalipay gid ’ko nga makilala ining grupo sang masaligan nga mga tawo. Makapalig-on gid ini sa sining tion nga may krisis sa ekonomiya kag sa komunidad.”

Nagasalig kita nga padayon nga suportahan ni Jehova ini nga proyekto para sa kadayawan sang iya ngalan.—Salmo 127:1.