Madamo nga mga doktor ang nagapasalamat sa kahimusan nga ginsugdan sang aton organisasyon sa bilog nga kalibutan para makahatag sang impormasyon parte sa pagbulong kag pag-opera nga wala nagatughong sang dugo. Bahin sining bug-os kalibutan nga kahimusan ang Hospital Information Services (Italy) nga ara sa branch sang mga Saksi ni Jehova sa Rome. Sang nagligad nga tuig, ang mga representante sang Hospital Information Services (Italy) kag ang mga miembro sang Hospital Liaison Committee nagbutang sang information booth sa National Congress of the Italian Society of Anesthesia, Analgesia, Resuscitation, and Intensive Care (SIAARTI), nga ginhiwat sang Oktubre 10 asta 13, 2018, sa Palermo, Sicily. Pagkatapos sang conference, ang mga kauturan nagbutang man sang booth sa Joint Congress of the Scientific Societies of Surgery nga ginhiwat sa Rome “La Nuvola” Convention Center.

Sa sini nga mga conference, may kahigayunan kita nga maghatag sang pinakabag-o nga mga impormasyon parte sa pagbulong nga wala nagatughong sang dugo sa interesado nga mga propesyonal sa patag sang medisina. Ang conference sa Palermo gintambungan sang 2,800 ka anesthesiologist. Ang sa Rome naman, nga ginapatihan nga amo ang pinakadaku nga conference sang mga surgeon sa Italy, gintambungan sang 3,500 ka surgeon. Nagtambong man ang mga representante sang respetado nga mga institusyon sa medisina. Nalakip sa sini ang mga miembro sang tanan nga asosasyon sang mga surgeon sa Italy kag sang Italy Chapter of the American College of Surgeons. Ini nga okasyon ginsuportahan man sang pila ka institusyon sang pungsod pareho sang Ministry of Health.

Ang anesthesiologist nga si Vincenzo Scuderi, halin sa Policlinico Hospital sa Catania sa Sicily, nagkadto sa aton booth sa conference sa Palermo. Sang Enero 18, 2019, gin-operahan niya ang isa ka pasyente nga Saksi nga may balatian sa tagipusuon. Nahimo niya ining grabe ka komplikado nga operasyon nga wala nagtughong sang dugo. Si Dr. Scuderi nagsiling: “Daku gid ang nabulig [sang inyo booth] sa SIAARTI 2018 Congress. Nakabulig gid sa amon ang mga impormasyon nga ginhatag ninyo.”

Subong, sobra 5,000 ka doktor sa Italy ang nagpasugot nga bulngon ang pasyente nga mga Saksi ni Jehova paagi sa safe kag epektibo nga mga teknik sa pagbulong kag pag-opera nga wala nagatughong sang dugo. Kada tuig sa Italy, may mga 16,000 ka pasyente nga Saksi ang ginabulong nga wala ginatughungan sang dugo.