Sang Mayo 15, 2019, ginsuportahan sang Supreme Court of Cassation, ang pinakamataas nga korte sa pungsod, ang kinamatarong sang aton kauturan sa pagdesisyon parte sa ila pagpabulong. Nagdesisyon ang Korte nga may kinamatarong ang pasyente nga magpili sang iya health-care agent nga magasuportar sang iya desisyon nga indi magpatughong sing dugo. Dugang pa, nagsiling ang Korte nga suno sa kasuguan sang Italy puede magtangdo sing health care agent ang isa ka pasyente, nga marepresentar sa iya enkaso madulaan sia sing animo ukon indi na makahambal.

Ini nga desisyon amo ang resulta sang sunodsunod nga pagbista kay Brother Luca Cappelli, nga isa ka gulang sa kongregasyon. Sang nagligad nga 25 ka tuig, nag-antos sia bangod sa abnormal nga pagpanghikot sang mga ugat sa iya utok. Bangod sini, kinahanglan ni Brother Cappelli sang malawig nga pagpabulong, kag kon kaisa amo ini ang rason kon ngaa indi sia makakomunikar. Para mahandaan ang iya pagpabulong, nagpil-ap sia sang isa ka Advance Medical Directive kag gintangdo ang iya asawa nga si Francesca bilang iya health-care agent. Pero, wala ginbaton sang isa ka hukom kag sang court of appeals ang iya asawa bilang iya health-care agent. Bangod sini, ginkuhaan nila sing kinamatarong si Brother Cappelli nga amligan ang iya kaugalingon batok sa indi nagakaigo nga pagtughong sing dugo.

Sang Pebrero 16, 2017, naglab-ot sa Supreme Court of Cassation ang kaso ni Brother Cappelli. Nagdesisyon ang Supreme Court nga ginlapas sang manubo nga mga korte ang Italian Constitution kag ang European Convention of Human Rights, nga pareho nga nagaamlig sa kinamatarong sang pasyente sa pagdesisyon. Nagsiling pa gid ang Korte nga “mas labi nga dapat amligan ang kinamatarong sang pasyente sa pagpangindi sa isa ka sahi sang pagbulong kon ginahimo niya ini bangod sa iya relihioso nga pagpati.” Bangod sining desisyon sang Supreme Court, ginapatuman subong sa mga korte sang Italy nga respetuhon gid ang kinamatarong sang aton kauturan nga indi magpatughong sing dugo.

Nalipay gid kita bilang mga Saksi ni Jehova sa bilog nga kalibutan sa pagpanghikot sang Supreme Court nga amligan ang kinamatarong sang aton kauturan sa Italy, sa ila padayon nga paghupot nga mangin matinlo ang ila konsiensia nga nabase sa Biblia parte sa paggamit sing dugo.—Binuhatan 15:29.