Sang Oktubre 25 kag 26, 2019, nagwaswas ang Bagyo Bualoi sa nasidlangan nga baybayon sang Japan. Amo ini ang ikatlo nga bagyo nga nagwaswas sa nasidlangan sang Japan sugod sang Septiembre, pagkatapos sang Bagyo Faxai kag Bagyo Hagibis. Bangod sang Bagyo Bualoi, nag-awas ang mga suba nga nagresulta sa grabe nga pagbaha sa lugar. Indi magnubo sa 81 ka balay sang aton mga kauturan ang nahalitan. Wala sang napatay sa aton mga kauturan, pero isa ka sister ang nasamaran. Ang mga kauturan sa Chiba Prefecture naapektuhan gid sining tatlo ka bagyo.

May gin-organisar na nga tatlo ka Disaster Relief Committee (DRC) para magbulig sa mga lugar nga naapektuhan sang Bagyo Faxai kag Bagyo Hagibis. Ginabuligan man subong sining mga DRC ang mga naapektuhan sang Bagyo Bualoi. Ginasuportahan sang branch sa Japan ang mga DRC para mahatag sa mga kauturan ang bulig nga ila kinahanglan, pareho sang pagpaninlo kag pagkay-o sang mga balay. Nagabuligay man ang mga manugtatap sang sirkito para mapalig-on ang mga kauturan.

Sa sining mabudlay nga tion, ginapangamuyo naton ang aton mga kauturan sa Japan, kag nagasalig nga atipanon ni Jehova ang iya mga sumilimba nga “nalisdan” bangod sining sunodsunod nga mga kalamidad.—Salmo 34:18.