OKTUBRE 4, 2022
JAPAN
Singkwenta Na ka Tuig ang Pag-imprinta sa Branch sa Japan
Ang tuig 2022 amo ang ika-50 nga tuig sang pag-imprinta sa branch sa Japan.
Halin sang 1950 asta sang 1970, mapisan nga nagbantala ang mga kauturan sa Japan, upod sa mga 70 ka misyonero, gani nagdamo gid ang mga manugbantala. Bangod kinahanglan ang madamo nga publikasyon nga base sa Biblia sa Japanese nga lenguahe, gindesisyunan nga sugdan sang branch sa Japan ang pag-imprinta sang Watchtower kag Awake! nga mga magasin.
Sang “Peace on Earth” nga Internasyonal nga Asembleya sa Tokyo sang Oktubre 1969, ginpahibalo ni Brother Nathan H. Knorr nga ang isa ka bag-o nga branch nga may imprintahan tukuron sa Numazu, malapit sa Mount Fuji.
Mga brother nga nagahanda sang mga printing plate sa una nga mga tinuig sang Bethel sa Numazu, Japan
Nagsugod ang konstruksion sang Enero 1972. Sang Agosto 15, 1972, gin-install ang isa ka 40-ton web rotary letterpress, kag ang iban pa nga makinarya nga kinahanglan sa paghimo sang mga magasin. Ang una nga magasin nga gin-imprinta sa sining bag-o nga branch amo ang Oktubre 8, 1972, nga isyu sang Awake! sa Japanese. Ang isa ka brother nga nagaobra sadto sa printing press nagsiling, “Nakahibi ako sa kalipay sang nakita ko ang mga box nga puno sang magasin nga bag-o lang naimprinta kag handa na nga ipadala.”
Sang 1982, ang branch sa Japan nagsaylo sa bag-o ginpatindog nga mga pasilidad sang Bethel sa Ebina. Ini nga pasilidad tatlo ka beses nga mas daku sangsa pasilidad sa Numazu. May bag-o man ini kag mas madasig nga mga printing press kag iban pa nga mga makinarya. Dugang sa Watchtower kag Awake! nga mga magasin, ginsugdan man sang branch ang pag-imprinta sang New World Translation of the Holy Scriptures. Nag-imprinta man sila sang base sa Biblia nga mga literatura sa sobra 200 ka lenguahe.
Piktyur sang mga brother sining karon lang sa Printery sa Ebina, Japan. Gina-adjust nila ang kadamuon sang tinta sa MAN Roland Lithoman web-offset press
Ang Printery sa Japan nagahimo subong sang 13.2 ka milyon ka kopya sang The Watchtower kag Awake! kada bulan. Halin sang 2013, ang branch nakaimprinta na sang sobra 20 ka milyon ka kopya sang Biblia sa sobra 100 ka lenguahe kag napadala ini sa sobra 50 ka pungsod sa bilog nga kalibutan.
Sang 1972, may mga 13,000 lang ka manugbantala sa Japan. Pagligad sang singkwenta ka tuig, sang 2022, naglab-ot na ini sa sobra 213,000 ka manugbantala. Nalipay gid kita nga sa bulig sini nga Printery nasuportahan ang hilikuton sang Ginharian sa Japan kag sa bilog nga kalibutan.—Mateo 28:19, 20.