ABRIL 2, 2019
KAZAKHSTAN
Ang mga Saksi ni Jehova sa Kazakhstan Nag-agda sa Publiko nga Magbisita sa mga Kingdom Hall
Sugod sang Mayo 11 asta Nobiembre 10, 2018, gin-agda sang mga Saksi ni Jehova sa Kazakhstan ang ila mga kaingod nga magbisita kag mag-tour sa mga Kingdom Hall sa pito ka pinili nga siudad sa bilog nga pungsod. Ini nga okasyon naghatag sing kahigayunan sa mga opisyal sang gobierno, journalist, kag mga propesor, pati ang publiko, nga matun-an ang parte sa mga Saksi ni Jehova. Sa kabilugan, sobra 1,500 ang nagkadto.
Mga lugar nga ginhiwatan sini nga okasyon: (1) Öskemen, (2) Qaraghandy, (3) Qostanay, (4) Semey, (5) Shymkent, (6) Taldyqorghan, kag (7) Taraz.
Ini nga mga tour ginhiwat sa mga Kingdom Hall sa mga siudad sang Öskemen, Qaraghandy, Qostanay, Semey, Shymkent, Taldyqorghan, kag Taraz. Ang mga nag-tour nawili gid sa pagtan-aw sa mga tsart kag mga piktyur nga nagapaathag sang aton hilikuton sa Kazakhstan, nga nagsugod pa sang 1892. Makita man sa displey ang mga nahimo sang mga Saksi sang nagligad nga tinuig, pareho sang pagpagua sang Bag-ong Kalibutan nga Badbad sang Balaan nga Kasulatan sa Kazakh nga lenguahe sang 2014.
Si Brother Bekzat Smagulov, nga nagatrabaho sa Legal Department and Public Information Desk sa sanga sang Kazakhstan, nagkomento parte sa mga benepisyo sini: “Ang amon mga kaingod nga nagbisita nanamian gid sa sini kag nakabulig ini sa ila nga mas maintiendihan kon sin-o gid kita. Lakip sa mga nagbisita ang mga opisyales sang Department of Religious Affairs kag ang mga journalist sang Kazakhstan-Öskemen, sang Rudnyi Altai nga newspaper, kag sang Semei Vesti nga newspaper.”
Sa Taldyqorghan, nga amo ang kapital sang rehiyon sang Almaty, gin-abiabi sang kauturan ang pangulo sang Regional Department of Religious Affairs upod sa duha pa ka opisyal sina nga department. Nagkadto man ang editor-in-chief sang Zhetysu Dialog nga newspaper, nga sang ulihi nagbalhag sang isa ka artikulo base sa mga interbyu sa pila ka boluntaryo sa sina nga okasyon.
Dugang pa, ang mga kauturan nagpanagtag sang sobra 560 ka kopya sang Bag-ong Kalibutan nga Badbad sa Kazakh kag Russian, ang panguna nga mga lenguahe sa Kazakhstan. Nagapasalamat gid kita sa positibo nga resulta sini nga kahimusan, nga nagadayaw kay Jehova kag nagahatag sing kahigayunan sa aton mga kaingod nga makita ang aton “maayong mga buhat.”—Mateo 5:16.
Sa Qaraghandy, si Sister Saniya Akhmetzhanova nagasugid sa apa nga mag-asawa parte sa aton panikasog nga tudluan sing Biblia ang mga apa paagi sa sign language.
Duha ka bata nga nagatan-aw sang video nga Proteksioni ang Inyo Kabataan sa Russian sa Qaraghandy.
Si Brother Lev Gladyshev nagapaathag sang kasaysayan sang mga Saksi ni Jehova sa Kazakhstan sa mga opisyales nga nagkadto sa Kingdom Hall sa Qaraghandy, lakip ang sekretaryo sang lokal nga parliamento, nga si Kudaibergen Beksultanov; ang chief specialist sang Department of Analysis of the Religious Situation, nga si Nikolay Sarsenbayev; kag ang pangulo sang Department of Religious Affairs sang rehiyon sang Qaraghandy, nga si Nurlan Bikenov.
Si Sister Aisha Yakovleva nagapaathag sang sarisari nga feature sang JW Library® app sa mag-asawa nga nagkadto sa Taldyqorghan.
Si Brother Aleksey Alyoshin nga nagapaathag sa mga bisita sa Taraz nga makita ang ngalan sang Dios sa mga sinulatan kag sa sarisari nga mga artifact sa kasaysayan.
Sa Öskemen, si Brother Sergey Petkevich nagapatan-aw sang daan nga gua sang Ang Lalantawan sa Russian, samtang ginapaathag niya ang kasaysayan sang mga Saksi ni Jehova sa Kazakhstan. Lakip sa mga nagkadto sa sini nga okasyon ang pangulo sang asosasyon nga Edinstvo, nga si Sergey Lebedev.
Si Brother Georgiy Pismenoy (sa tuo) nagaistorya sa isa ka kaingod nga nagkadto sa Qostanay. Natan-aw sang mga nagkadto sa sini nga okasyon ang isa ka video sang 1982 parte sa bista sa tatlo ka brother kag isa ka sister halin sa Qostanay nga ginpamatbatan nga nakasala bangod sa pagpanag-iya, paghimo, kag pagpanagtag sang aton literatura nga ginadumilian sadto. Si Brother Pismenoy isa sa sadtong tatlo ka brother nga ginsentensiahan sing duha ka tuig kag tunga nga grabe nga pagtrabaho. Ginsugid niya sa mga bisita ang iya eksperiensia sa prisuhan.
Ang mga bisita gin-abiabi sang mga musikero nga nagatokar sang mga instrumento, lakip ang Kazakh dombra (sa kilid sa wala kag sa kilid sa tuo), sa Shymkent.
Mga kauturan nga nagboluntaryo sa sini nga okasyon sa Qaraghandy.
Basi Manamian Ka Man
BETHEL TOUR