Sining karon lang, ang Ministry of Education sa Kenya nagmando sa mga opisyal sang mga eskwelahan nga proteksionan ang kinamatarong sang mga estudyante parte sa relihion. Ginpagua ini nga mando sang Marso 4, 2022. Nagalaum kita nga makabulig ini para proteksionan ang kinamatarong sang mga bata sang mga Saksi ni Jehova, nga nangin biktima sang diskriminasyon sa madamo nga tinuig.

Sugod sang 2015, mga 36 ka bata sang mga Saksi ni Jehova ang gin-expelled ukon gin-suspended kay wala sila nagaentra sa relihioso nga mga seremonya nga ginahimo sa eskwelahan. Sang 2018, ang mga representante halin sa branch office sang mga Saksi ni Jehova sa Nairobi nagpakigkita sa mga opisyal sang Ministry of Education para magpangayo sing bulig nga mauntat ini nga diskriminasyon. Halimbawa sang Oktubre 23, 2018, ang mga representante nagpakigkita sa Cabinet Secretary for Education nga si Dr. Amina Mohamed.

Maathag nga mabasa sa mando sang gobierno nga may pila ka “mga administrator kag manager sa mga eskwelahan” sa Kenya “nga nagagamit sang sarisari nga balibad para mapahalin nila ang mga estudyante sa mga eskwelahan.” Mabasa gid sa mando nga “may pila ka eskwelahan nga nagasupak sang kinamatarong sa relihion sang pila ka estudyante kag wala nagabaton ukon nagapang-expelled sang mga estudyante sa eskwelahan base lamang sa relihion.”

Ginbalita gid sa Kenya ini nga mando. Ang mga News agency nagsiling nga bangod sina nga mando mas nag-athag nga “ang paglapas sa relihioso nga mga kinamatarong supak sa madamo nga kasuguan sa pungsod, pati man sa mga kasugtanan sa tunga sang mga rehiyon kag mga pungsod, . . . ilabi na, supak ini sa Konstitusyon sang Kenya.” Gani, ang mga bata sang mga Saksi kag ang iban pa indi puede suguon “nga maghimo ukon mag-entra sa isa ka buhat nga kontra sa iya relihion.” Sa katapusan, ginapangabay sini ang tanan nga opisyal sang mga eskwelahan nga tumanon ini nga mando.

Si Kimberly Nyang’ate, nga isa ka 17 anyos nga sister sa Nairobi, nagsiling: “Sobra na kalima ginpatawag sang eskwelahan ang akon mga ginikanan bangod indi ako mag-entra sa mga seremonya sang iban nga relihion. Nalipay gid ako sa sini nga mando kay ginaproteksionan sini ang aton desisyon nga tumanon ang Biblia.”

Nagapasalamat gid kita sa mga opisyal nga naghimo sini nga mando, nga makabulig sa mga bata nga nagaeskwela pa sa Kenya para padayon nila nga matuman ang mga pagpati sang ila relihion.—1 Corinto 15:58.