Sang Mayo 12, 2023, ang Court of Appeal sang Kenya naghimo sing importante nga desisyon nga nagaproteksion sang kahilwayan sa relihion sang nagaeskwela nga mga bata sa sina nga pungsod. Bisan pa may kasuguan sa Kenya nga indi puede piliton ang bisan sin-o nga mag-entra sa bisan ano nga hilikuton nga kontra sa ila relihioso nga pagpati, halin sang 2015 may 41 ka mga bata sang mga Saksi ni Jehova ang ginpahalin ukon gin-suspend sang eskwelahan bangod nangindi sila nga mag-entra sa ginahimo sang iban nga relihion.

Ang desisyon sang Court of Appeal nga pabor sa mga Saksi naangot sa kaso nga natabo sang 2017. Siam ka Saksi nga mga estudyante ang matinahuron nga nangindi sa pag-entra sa ginahimo sang iban nga relihion sa eskwelahan. Nakalab-ot sa korte ang ila kaso. Sang 2019, nagdesisyon ang isa ka manubo nga korte nga wala ginlapas sang eskwelahan ang panguna nga kinamatarong sang mga bata nga Saksi sang ginpilit sila nga mag-entra. Pero, sang Mayo 12, 2023, nakita sang Court of Appeal sa Kenya nga “nalapas ang kinamatarong sang mga estudyante sa edukasyon kag kinamatarong nga respetuhon.” Nagsiling pa ang korte nga ang mga pagsulundan nga nagapilit sa mga Saksi ni Jehova nga mag-entra sa mga hilikuton sang relihion “indi patas, batok sa kasuguan, kag indi dapat ipatuman.” Ang isa ka hukom nga nagdesisyon sa sini nga kaso nagsulat: “Ang desisyon sini nga Korte dapat mangin basihan sa palaabuton sang mga eskwelahan kon parte sa kinamatarong sa relihion sang mga estudyante.”

Ginpabakod pa gid sini nga desisyon ang mando nga ginpagua sang Marso 2022 sang Ministry of Education sang Kenya nga nagasugo sa mga opisyal sang eskwelahan nga proteksionan ang kinamatarong sa relihion sang tanan nga estudyante. Ini nga desisyon naghimo sa Kenya nga isa sa mga pungsod sa Africa, lakip ang Malawi kag Rwanda, nga nagpagua sang mga desisyon para proteksionan ang panguna nga mga kinamatarong sang Saksi nga mga estudyante.

Ang aton maisog nga mga pamatan-on sa Kenya kag sa bilog nga kalibutan makasalig nga nalipay gid si Jehova sa ila samtang mabakod sila nga nagapanindugan para sa putli nga pagsimba!—Hulubaton 29:25.