Gindedikar ang isa ka bag-o nga Bible school facility sa Eldoret, Kenya, sang Nobiembre 9, 2019. Si Brother Bengt Olsson, nga miembro sang Komite sang Sanga sa Kenya, amo ang naghatag sang pamulongpulong sa dedikasyon. Gintambungan ini sang 1,199 lakip ang mga 500 ka pinasahi nga bug-os tion nga mga alagad nga nagbiyahe pa halin sa sarisari nga bahin sang pungsod. Sa sining 433 metros kuadrados nga pasilidad pagahiwaton ang mga klase sang School for Kingdom Evangelizers (SKE) kag sang School for Circuit Overseers and Their Wives. Ginapaabot nga indi magnubo sa apat ka klase sang SKE ang magagradweyt diri kada tuig.

Ang mga bilding sa sini nga pasilidad ginagamit sadto sang branch. Ang isa ka bilding nga missionary home sadto gin-renovate para magamit bilang laundry, kitchen, kag dining area sang eskwelahan. Ang Kingdom Hall ginhimo nga classroom. Ginsugdan ang pag-renovate sang Abril 1, 2019 kag halos natapos ini sang Septiembre 9.

Ginpaathag ni Brother Olsson kon daw ano ka importante ini nga eskwelahan: “Madamo nga tawo sa East Africa ang gusto gid magtuon parte kay Jehova nga Dios. Sigurado kami nga ang paghanas nga mabaton sang mga estudyante sa sini nga eskwelahan makabulig sa ila nga tudluan ang mga tawo nga nagadugok sa bukid ni Jehova.”—Miqueas 4:1.