Ginpagua sang mga Saksi ni Jehova ang Bag-ong Kalibutan nga Badbad sang Balaan nga Kasulatan sa lenguahe nga Luo sa isa ka rehiyonal nga kombension sa Kisumu, Kenya, sang Agosto 30, 2019. Si Brother Remy Pringle, nga miembro sang Komite sang Sanga sa Kenya, ang nagpagua sang Biblia sa una nga adlaw sang kombension. Sa kabilugan, 2,481 tanan ang nagtambong sa sini, pati ang mga naka-stream sa duha pa ka kombension sa iban nga lokasyon.

Naglab-ot sing mga tatlo ka tuig ang pag-translate sini. Ang isa ka miembro sang translation team, nagsiling: “Daku gid ang mabenepisyo sa sini sang kauturan nga madugay na nagahulat nga makatigayon sing Bag-ong Kalibutan nga Badbad sa Luo. Ang kalabanan sa amon kongregasyon indi makasarang magbakal sang kompleto nga Biblia para sa kada miembro sang ila pamilya, kay mahal ini katama. Pagpakamaayo gid ini kay makatigayon na sing kaugalingon nga Biblia ang tanan. Kag bangod moderno nga mga tinaga nga madali maintiendihan ang gingamit sa sini nga translation, mas mangin makapalig-on ang ila personal kag pangpamilya nga pagsimba.”

Ang kompleto nga Bag-ong Kalibutan nga Badbad ukon ang pila ka bahin sini na-translate na sa 184 ka lenguahe, pati ang 25 ka kompleto nga rebisyon base sa 2013 nga edisyon. Sigurado nga ini nga Biblia makabulig gid sa 1,800 ka manugbantala sa Kenya nga nagahambal sing Luo nga mangin mas malapit kay Jehova. Makabulig man ini sa ila nga mangin mas epektibo sa ila pagbantala sa sobra 5 ka milyon ka tawo nga nagahambal sing Luo.—Mateo 24:14.