Sang Hunyo 7, 2022, ang tanan nga judge sa European Court of Human Rights (ECHR) nagdesisyon nga nagsala ang Lithuania sa kaso ni Brother Stanislav Teliatnikov, nga nangindi nga magsoldado bangod sa iya konsiensia. Nagsiling ang ECHR nga ang kinamatarong sa pagpangindi nga magsoldado ginagarantiyahan sang Article 9 (kahilwayan sa panghunahuna, konsiensia, kag relihion) sang European Convention on Human Rights. Gani napamatud-an nga ginlapas sang Lithuania ang Convention kag ginmanduan nga bayran si Stanislav sing 3,000 ka euro ($3,196 U.S.).

Halos ang tanan nga pungsod nga miembro sang Council of Europe nagpatuman sang alternative civilian service (ACS) nga programa kon kinahanglanon. Sang ginpatawag si Stanislav para magsoldado, nangabay sia sang ACS suno sa ginapatuman sa Europe. Pero ang Lithuania wala sing ACS. Sa desisyon sang ECHR batok sa Lithuania, pareho man sa desisyon sini batok sa Armenia, Azerbaijan, kag Turkey, ginsulit sang ECHR nga ang tanan nga pungsod nga miembro sang Council of Europe dapat may ginatanyag nga alternative sa pagsoldado nga indi pagsilot, wala sing diskriminasyon batok sa isa ka citizen, kag wala sing labot sa militar.

Ang Armenia nagpatuman na sang nagakaigo nga ACS nga programa. Ang mga pamatan-on nga lalaki nga nangindi nga magsoldado bangod sa konsiensia ginaasayn sa mga hilikuton nga makabulig sa komunidad.

Nagalaum kita nga sundon man sang Lithuania ang desisyon sang ECHR nga magpatuman sang ACS para makabenepisyo ang aton mga kauturan kag ang komunidad. Pero subong, nahibaluan naton nga padayon nga giyahan kag suportahan ni Jehova ang aton mga kauturan sa Lithuania.—Panalambiton 3:25.