Sang Mayo 27, 2023, gindedikar ang bag-o nga Bible school facility sa Antananarivo, Madagascar, sa isa ka Kingdom Hall malapit sa sini. Si Brother Kenneth Cook, Jr., miembro sang Nagadumala nga Hubon, amo ang nagpamulongpulong sa dedikasyon nga natig-uluhan “Isa ka Bilding nga Nagadayaw kay Jehova.” Pagkadason nga adlaw, ginhiwat ang isa ka espesyal nga programa sa isa ka Assembly Hall didto kag gin-broadcast ini sa sobra sa 45,000 ka tagpalamati.

Halin sang Disiembre 1999, ang mga klase sang eskwelahan sa pagtuon sa Biblia ginahiwat sa branch sa Madagascar. Pero, amat-amat nga indi na makaigo diri ang mga kauturan nga gusto makabaton sang dugang nga paghanas. Sang Hulyo 2020, ginbakal ang isa ka propiedad nga may kalaparon nga 1,348 ka metro kuadrado nga puede lang lakton halin sa branch. Wala magdugay nagsugod ang konstruksion sa sini nga pasilidad. Bisan pa sa mga restriksion bangod sang COVID-19 nga pandemic, nakompleto ang proyekto sa wala pa duha ka tuig. Ang propiedad may isa ka bilding para sa mga classroom kag isa pa ka bilding para dayunan sang mga estudyante kag mga instruktor. Ang mga klase para sa School for Kingdom Evangelizers kag sa School for Circuit Overseers and Their Wives hiwaton sa sini nga lokasyon.

Samtang nagadamo ang mga eskwelahan para sa pagtuon sa Biblia, ang paghanas nga ginahatag sini magabulig sa mga kauturan nga ‘ipaathag ang espirituwal nga mga butang paagi sa espirituwal nga mga pulong.’—1 Corinto 2:13.