Sang Abril 24, 2022, gin-release ni Brother Frank Madsen, miembro sang Branch Committee sa Malawi, ang digital version sang Bag-ong Kalibutan nga Badbad Sang Cristianong Griegong Kasulatan sa Chiyao. Ang narekord na nga daan nga programa ginpagua paagi sa satellite television kag sa iban pa nga paagi, pareho sang JW Box kag JW Stream, sa sobra 148,000 ka tumalambong. Ang naimprinta nga mga kopya mangin available sa palaabuton.

Ang bilog nga Biblia available na sa Chiyao halin pa sang 2014. Pero ini nga translation indi sibu kag indi gid mabasa diri ang ngalan sang Dios nga Jehova, bisan pa linibo ka beses nga makita ini sa orihinal nga teksto.

Gani, nabudlayan gid ang madamo nga manugbantala nga gamiton ini nga mga Biblia sa ila pagbantala. Ang isa ka translator nagsiling: “Imbes nga tudluan ang mga tawo sang importansia sang ngalan sang Dios, nagakaubos ang amon oras sa pagpaathag kon ngaa indi makita ang ngalan sang Dios sa Biblia.” Halimbawa, ang isa ka Biblia sa Chiyao nag-translate sang Mateo 22:44 nga “ang Ginuo nagsiling sa akon Ginuo.” Pero, sibu nga gin-translate ini sang Bag-ong Kalibutan nga Badbad nga “si Jehova nagsiling sa akon Ginuo.”

Parte sa mga benepisyo sining bag-o gin-release nga Biblia, ang isa ka translator nagsiling: “Bangod maathag kag mahapos intiendihon ang Bag-ong Kalibutan nga Badbad Sang Cristianong Griegong Kasulatan sa Chiyao, maintiendihan dayon sang mga tawo ang ginasiling sini kag mapahulag sila nga iaplikar ang ila natun-an.”

Nalipay gid kita nga magamit na ini nga Biblia para buligan ang minilyon ka tawo nga nagahambal sang Chiyao nga makilala ang ngalan ni Jehova, “ang Labing Mataas sa bug-os nga duta,” kag mangin malapit sa iya.—Salmo 83:18.