Ang Komite sang Sanga sa Malawi naghimo sing kahimusan para ma-broadcast sa lokal nga mga estasyon sang TV kag radyo ang mga miting sang kongregasyon. Gani indi lang ang aton mga kauturan ang makatan-aw kag makapamati sa mga miting. May sobra 100,000 ka Saksi ni Jehova sa Malawi, pero ginabulubanta sang mga broadcaster nga kon Sabado kag Domingo, duha ka milyon ang nagatan-aw sang programa sa TV kag walo ka milyon ang nagapamati sa radyo.

Pareho sa nagakatabo sa madamo nga pungsod, indi makatipon sa Kingdom Hall ang aton mga kauturan sa Malawi bangod sa mga ginapatuman sang gobierno parte sa social distancing. Pero halos tanan nga manugbantala may TV ukon may radyo. Gani, ang mga kauturan nga wala sing Internet kag indi makahiwat sang ila miting paagi sa videoconference makatan-aw ukon makapamati gihapon sang mga miting.

Gina-broadcast ang mga miting sa Chichewa, ang panguna nga lenguahe sang pungsod. Ang bilog nga programa sa TV gina-translate man sa Malawi Sign Language. Indi lang public talk ang gina-broadcast sa aton miting, kundi pati man ang aton mga video ukon ang mga gindrama nga pagbasa sa Biblia. Sa katapusan nga bahin sang programa, ginapahibalo sa mga tagpalamati kag sa tumalan-aw nga puede nila mabisitahan ang jw.org nga website kon gusto nila sang dugang nga impormasyon sa iban nga mga lenguahe.

Bangod sini nga mga broadcast, natadlong ang sala nga mga pagpati sang iban nga tawo parte sa mga Saksi ni Jehova. May isa ka lalaki nga nagsulat: “Napamatian ko ang inyo sermon sa radyo sining nagligad nga mga semana. Nagahatag ini sing maayo nga sabat sa mga kabutigan nga ginapalapta sang mga tawo batok sa inyo. Lain gid sa iban nga relihion ang inyo mga sermon kay matandog gid ninyo ang amon tagipusuon!” Ini nga lalaki kag ang iya pamilya nagsugod na sa pagtuon sa Biblia upod sa mga Saksi ni Jehova.

Si Augustine Semo, nga nagaalagad sa Public Information Desk sa Malawi, nagsiling: “Daku gid nga bulig sa aton mga kauturan ini nga mga broadcast para mapadayon nila ang ila rutina sa pag-alagad sa Dios. Kag madamo nga indi Saksi ang makabalo sang aton mga panudlo nga nabase sa Biblia. Kon magbalik na sa normal ang sitwasyon sa Malawi, tani madamo sing bag-uhan nga magatambong sa Kingdom Hall.”

Nalipay kami kay ang aton mga kauturan kag ang iban sa Malawi makasimba gihapon kay Jehova sa sining mabudlay nga mga tion. Ginapabakod sini ang aton apresasyon sa ‘matutom nga ulipon,’ nga nagapanikasog nga matudluan ang tanan sang kamatuoran halin sa Biblia.—Mateo 24:45.