Ang bag-o nga legal nga organisasyon nga ginatawag Jehovah’s Witnesses in Malta (JW-Malta) narehistro na sining karon lang sa pungsod. Nabaton sang JW-Malta ang Certificate of Registration of a Legal Person a sang Disiembre 28, 2021.

Naorganisar ang mga Saksi ni Jehova sa Malta sang dekada ’70. Pero sa sulod sang mga tinuig, ang mga kongregasyon wala marehistro. Bangod sini, nabudlayan ang mga kongregasyon sa pagpanag-iya sang mga propiedad ukon bisan sa pagbukas lang sang bank account. Sang 1994, ang International Bible Students Association (IBSA) nangin indi rehistrado nga organisasyon sa Malta. Bisan pa nga may pila ka kinamatarong ang IBSA, limitado gid ini. Bangod ginkilala na ang JW-Malta, nangin mahapos na ang pagpanghikot sang country office kag sang mga kongregasyon.

Parte sa pagparehistro sining karon lang, si Brother Joe Magri, miembro sang Country Committee sa Malta, nagsiling: “Makapabakod gid sang pagtuo nga makita kon paano kami ginbuligan ni Jehova nga marehistro. Ginpakamaayo niya kami paagi sa bulig sang mga kauturan sa Legal Department sa Britain kag sa world headquarters amo nga nangin madinalag-on ang pagparehistro. Nalipay gid kami nga masuportahan ang mga intereses sang Ginharian kag madayaw si Jehova paagi sa pagbutang sang iya ngalan sa bag-o narehistro nga organisasyon.”

Subong, sobra 800 ka Saksi sa Malta ang nagaalagad sa 11 ka kongregasyon. Nalipay gid kita nga ang hilikuton sa ‘pagbantala sang Ginharian sang Dios,’ nga ginsugdan sa Malta ni apostol Pablo mga 2,000 ka tuig na ang nagligad, padayon nga nagauswag nga “wala sing upang.”—Binuhatan 28:1, 30, 31.