Gin-aprobahan sang Nagadumala nga Hubon ang plano nga sayluhon ang branch office sang Central America, nga ara subong malapit sa Mexico City, Mexico. May gin-asayn nga Construction Project Committee (CPC) nga may lima ka miembro nga magadumala sang pagsaylo sang branch. Nagapangita na subong ang CPC sang maayo nga lugar para sa bag-o nga branch office.

Halin sang 1974, pila ka beses na nga gin-renovate kag ginpadaku ang daan nga branch. Sang 2011, gindugang pa gid sa ginadumalahan sang branch sa Central America ang mga hilikuton sa Belize, Costa Rica, El Salvador, Guatemala, Honduras, Nicaragua, kag Panama. a Para maatipan sing maayo ang ila kinahanglanon subong, dapat pasangkaron kag i-upgrade ang mga pasilidad sang branch. Gani gindesisyunan nga kinahanglan maghimo sang pasilidad sa lain nga lugar para maatipan sing mas maayo ang nagadaku nga branch sa Central America. Mangin mas maayo man ini nga lugar para masuportahan pa gid ang pagbantala sang Ginharian.

Ang pagsaylo sang branch tungaon sa pila ka phase ukon hugna. Ang una nga phase sang project nagalakip sang pagbakal sang propiedad kag pagpatindog sang residence kag mga opisina para sa 300 ka Bethelite. Pagkatapos sini, himuon ang dugang nga residence kag mga ulubrahan nga kinahanglan sang pamilya Bethel.

Si Brother Joseph Yi, nga miembro sang CPC, nagsiling: “Nagabuligay kami subong sang Branch Committee sang Central America para mahibaluan kon diin nga state sa Mexico ang pinakamaayo patindugan sang bag-o nga branch complex. Ang isa sa ginapangita gid namon amo ang lugar diin maayo ang pagbaton sang mga opisyal kag sang komunidad sa sini nga proyekto. Excited na kami nga makita kon paano giyahan ni Jehova ang amon mga panikasog.”

Excited na gid kita sa sining bag-o nga construction project kag ginapangamuyo naton nga pakamaayuhon ini ni Jehova.—Hulubaton 16:3.