Sang Oktubre 25, 2019, may rehiyonal nga kombension nga ginhiwat sa Chiapas, Mexico, sa Poliforum of Tuxtla Gutiérrez. Sa sini nga kombension, ginpagua ni Brother Armando Ochoa, nga miembro sang Komite sang Sanga sa Central America ang Bag-ong Kalibutan nga Badbad sang Balaan nga Kasulatan sa Tzotzil. Ini nga okasyon naka-video stream man sa Centro de Convenciones. Ang kabilugan nga nagtambong naglab-ot sa 3,747.

Ang Bag-ong Kalibutan nga Badbad sang Cristianong Griegong Kasulatan sa Tzotzil ginpagua sang Disiembre 26, 2014, kag ginpanagtag ini sa mga tawo nga nagahambal sang Tzotzil, nga ang kalabanan nagaistar sa mga kabukiran kag mga kapatagan sa estado sang Chiapas, Mexico. Sa sobra 16,000,000 ka mga nitibo sa Mexico, mga tunga sa milyon ang nagahambal sang Tzotzil, kag nalakip sa ila ang 2,814 ka mga Saksi ni Jehova.

Madamo sing kabudlayan nga gin-atubang ang mga translator sa Tzotzil nga lenguahe. Halimbawa, diutay lang ang sekular nga mga literatura nga nabalhag sa Tzotzil kag pila lang ka diksionaryo ang matigayon. Dugang pa, ini nga lenguahe may pito ka dialekto nga ginagamit sa sarisari nga rehiyon. Gani kinahanglan pilion sing maayo sang mga translator ang mga tinaga nga maintiendihan sang tanan nga mga bumalasa sang Tzotzil.

Ang isa sa mga translator nagsiling: “Sa sini nga Biblia, ginagamit ang ngalan sang Dios nga Jehova. Gani makabulig ini sa mga bumalasa nga makatigayon sing personal nga kaangtanan sa iya. May duha ka iban pa nga Biblia nga na-translate sa Tzotzil. Pero ang ngalan sang Dios kaisa lang gingamit sa sini nga mga Biblia kag makita ini sa isa ka footnote sa Exodo. Gani ang Bag-ong Kalibutan nga Badbad amo ang una nga Biblia sa Tzotzil nga lenguahe nga nagbutang liwat sang ngalan sang Dios sa nagakaigo nga lugar sini sa Biblia.” Dugang pa, ang isa ka manugbantala nga nagahambal sang Tzotzil nagsiling nga ang “iban nga translation sang Biblia sa Tzotzil mahal, gani pila lang ka tawo ang makasarang magbakal sini. Pero ang Bag-ong Kalibutan nga Badbad matigayon sang tanan sing libre lang.”

Ining bag-o ginpagua nga Biblia sigurado nga makabulig gid sa tanan nga nagahambal sang Tzotzil nga “mahunahunaon sa ila espirituwal nga kinahanglanon.”—Mateo 5:3.