Sang Oktubre 25, 2023, nag-landfall ang Bagyo Otis sa southwestern nga baybayon sang Mexico, malapit sa siudad sang Acapulco, Mexico nga ginakadtuan sang mga turista. Ining Category 5 nga bagyo mas mabaskog sangsa bisan ano nga bagyo nga narekord sa sina nga bahin sang Pacific Ocean. Nagdala ini sang makusog nga hangin nga sobra 265 ka kilometro kada oras, mabunok nga pag-ulan, kag grabe nga pagbaha. May mga report sang madamo nga pagkaguba sang mga kalsada, mga bilding, kag mga linya sang kuryente. Linibo ang wala sang kuryente asta subong. Indi magnubo sa 45 ka tawo ang napatay.

Ang masunod nga impormasyon ginkuha sa pinakauna nga mga report halin sa mga kauturan didto.

• Wala sang utod nga napatay ukon nasamaran

• Sobra 10,000 ka kauturan ang nagaistar sa apektado nga lugar

• 1 ka Assembly Hall sa Acapulco ang may daku nga guba

• Ang mga manugtatap sang sirkito kag ang mga gulang nagahatag sang paumpaw halin sa Biblia kag sang praktikal nga bulig sa mga naapektuhan sa sina nga lugar

• 4 ka representante halin sa branch sa Central America ang nagbisita kag naghatag sang pagpalig-on kag suporta

• May Disaster Relief Committee nga gin-asayn para dumalahan ang pagbulig

Ginapangamuyo naton nga padayon nga hatagan ni Jehova sang kalinong kag paumpaw ang aton pinalangga nga mga kauturan nga naapektuhan sang Bagyo Otis.—Filipos 4:6, 7.