Sang Oktubre 17, 2019, nagtiniruhay ang mga pulis upod ang mga security forces kontra sa mga miembro sang armado nga drug cartel sa Culiacán, Sinaloa, Mexico, nga isa ka siudad nga may halos isa ka milyon ka pumuluyo. Naglawig sing pila ka oras ang pagtiniruhay, kag ginsira ang mayor nga mga kalsada, ginpanunog ang mga salakyan, kag nagpalagyo ang mga priso halin sa malapit nga prisuhan. Suno sa mga opisyal, indi magnubo sa 14 ka tawo ang napatay. Makapasubo nga ginreport sang branch sa Central America nga ang isa naton ka brother, nga si Noé Beltrán, napatay sa sini nga kinagamo.

Si Brother Beltrán, nga 39 anyos kag may tatlo ka bata, ara sa iya obra sang nasalabat sia. Ang mga kauturan didto, pati ang manugtatap sang sirkito, nagahatag na sang paumpaw halin sa Biblia kag pagpalig-on sa iya asawa nga si Rocío kag sa ila magagmay nga kabataan.

May sobra 7,000 ka manugbantala sa 80 ka kongregasyon sa Culiacán. Sa tion sang kinagamo, gin-adjust sang pila ka kongregasyon ang ila midweek meeting kag mga miting para sa pag-alagad sa latagon. Ang pila ka kauturan nag-stream na lang sang midweek meeting sa ila mga balay. Ginapangunahan sang mga manugtatap sang sirkito ang pag-shepherding sa tanan nga naapektuhan sining makahaladlok kag wala ginapaabot nga kinagamo.

Nasubuan gid kita sa pagkapatay ni Brother Beltrán, gani ginapangamuyo naton nga padayon nga buligan ni Jehova si Sister Beltrán kag ang ila kabataan. Ginapaabot na gid naton ang tion nga ang duta mapuno sing paghidait kag ang kalisod mabuslan sang ‘kalipay.’—Marcos 5:42.