Halin sang Enero asta Hulyo 2022, may lima ka bag-o nga remote translation office (RTO) nga nagsugod sa pagpanghikot sa Mexico. Gani, may ara na subong sing 25 ka RTO sa teritoryo sang branch sang Central America. Bangod sining bag-o nga mga RTO, ang mga translation team sang Tarascan, Tzotzil, Zapotec (Isthmus), Otomi (Mezquital Valley), kag Chol nga mga lenguahe makaistar na sa lugar nga madamo sing tawo nga nagahambal sini nga mga lenguahe. Sa masunod nga mga binulan, 8 pa ka RTO ang magabukas sa teritoryo sang branch sang Central America, kag 34 pa ka dugang nga mga RTO ang ginaplano nga himuon.

May daku nga bentaha kon ang mga translator nagaistar kag nagaobra sa lugar diin madamo nga tawo ang nagahambal sang ila lenguahe. Si Sister Marcela Hernández, isa ka translator sa Tzotzil, nga nag-obra sa branch office sing pila ka tuig, nagsiling: “Sang didto pa kami sa branch, natalupangdan ko nga ang akon pag-translate daw mabudlay na hangpon. Pero subong, mabatian ko na kon paano maghambal kag mag-preaching ang mga kauturan sa kongregasyon, gani nangin mas natural man ang akon pag-translate.”

Ang mga tawo sa mga lugar nga ginbutangan sang RTO nagdayaw sa katinlo kag katahom sini nga mga pasilidad. Pirme nagakatabo nga may mga tawo nga nagadulog para maglantaw sa sini nga mga bilding kag ang iban nagapapiktyur pa. Ang isa ka babayi nga may gamay nga tiendahan sa atubang sang isa ka RTO nalipay gid sang nabal-an niya kon ano ang ginahimo sa sini nga RTO. Gani, pirme niya ginatinluan ang iya tiendahan kag ginasilhigan ang atubangan sini. Nagsiling sia, “Ara gid ako sa atubang sang bilding nga gindedikar sa Dios.”

Maathag gid ang pagpakamaayo ni Jehova sa mga buluhaton sa sini nga mga RTO. Ginapasalamatan gid naton sia sa padayon nga kadalag-an sang aton hilikuton sa pag-translate.—Salmo 127:1.