Duha ka mabaskog nga linog ang natabo sa Guatemala kag Mexico sang 2017. Sang Disiembre 2018, natapos sang aton kauturan ang proyekto sa pagbulig sa sini nga rehiyon.

Ginsugdan sang sanga sa Central America ang pagbulig paagi sa paghiwat sang pila ka miting para palig-unon ang kauturan nga naapektuhan sang mga kalamidad. Ini nga mga miting ginhiwat sa estado sang Chiapas, Morelos, Oaxaca, Puebla, kag pati sa Mexico City. Sa kabilugan, 39 ka Disaster Relief Committee ang nagpanghikot sa panuytoy sang Branch Committee para maorganisar ang pagpatindog liwat sa mga naguba.

Sa Mexico, sobra 42,000 ka manugbantala halin sa napulo ka estado ang nagboluntaryo sa sini nga proyekto. Ang mga kauturan nakatukod sang 619 ka balay, 5 ka Kingdom Hall, kag 2 ka Assembly Hall. Ginkay-o man nila ang 502 ka balay kag 53 ka Kingdom Hall. Sa Guatemala, may dugang pa nga napulo ka balay nga gintukod.

Lakip sa pamilya nga mga Saksi nga nabuligan amo ang pamilya sang mga Hernández kag Santiago.

Ang pamilya sang mga Hernández nagaistar sa siudad sang Chalco, nga 40 kilometros sa gua sang Mexico City. Sang naglinog sang Septiembre 19, 2017, nawasak gid ang ila balay. Si Sister Ana María Hernández nagsiling: “Sa sining tion sang kabudlayan, natigayon gihapon namon ang amon mga kinahanglanon. Gin-atipan gid kami sang amon kauturan. Madumduman ko pa nga sa ginatindugan anay sang amon balay, may 50 ukon sobra pa ka boluntaryo nga nagabulig para matukod ang amon bag-o nga balay. Asta subong, ang amon mga kaingod daw indi gihapon makapati sa ginhimo sang kauturan para sa amon.” Dugang pa sa sining praktikal nga bulig, ginbisitahan sang representante sang sanga sa Central America ang pamilya Hernández para palig-unon sila base sa Biblia.

Ang pamilya Santiago, nga nagaistar sa Juchitán sa estado sang Oaxaca, naapektuhan gid sang naglinog sang Septiembre 7, 2017. Nawasak gid ang ila balay bangod sa linog. Pero, wala pa anom ka bulan, napatindugan na sila sang mga boluntaryo sang bag-o nga balay. Ang amay sini nga pamilya nga si Brother Victor Santiago nagsiling: “Nagdayaw gid ako sa kadasig sang pagbulig sa amon sang organisasyon ni Jehova. Nakita ko nga bal-an gid ni Jehova kon ano ang amon kinahanglan kag ginaatipan gid niya kami.”

Si Brother Jesse Pérez, nga miembro sang Branch Committee sa Central America, nagkomento: “Ining duha ka linog madamo gid sing ginguba. Pero ang proyekto sa pagbulig naghatag sing kahigayunan sa kauturan nga magboluntaryo. Madamo nga manugbantala ang nagbulig, nga nagapakita sang ila gugma sa ila kauturan. Nalipay gid kami nga ginpakamaayo ni Jehova ining ‘ministeryo sang pagbulig.’”—2 Corinto 8:1-4.