NOBIEMBRE 4, 2015
MEXICO
Award sa mga Saksi Bangod sa Pagtudlo sing Biblia sa mga Prisuhan sa Mexico
MEXICO CITY—Ang mga opisyal sang estado sang Baja California, Mexico, naghatag sing sertipiko sa mga Saksi ni Jehova bangod ginaapresyar ang ila pagtudlo sing Biblia sa mga prisuhan sang estado. Ini nga dokumento ginpirmahan ni Daniel De La Rosa Anaya, ang sekretaryo sang public security sang estado, kag ni Jesús Héctor Grijalva Tapia, ang sekretaryo sang mga prisuhan sang estado.
Ang sertipiko nagasiling: “Ang gobierno sang estado, paagi sa sekretaryo sang public security, nagapasalamat gid sa mga Saksi ni Jehova bangod sa ila daku nga bulig, dedikasyon, hilikuton, kag pagtuman sa ila obligasyon sa komunidad sang Baja California; nga nagabulig sa pagpauswag sang kabuhi kag nagapahapos sa mga napriso nga mangin maayo nga mga pumuluyo kon makagua na sila.”
Direktor sang Social Rehabilitation Center sa Mexicali nga si Jesús Manuel López Moreno.
Regular nga ginabisitahan sang mga Saksi ni Jehova ang mga prisuhan sa Baja California, lakip na ang sa Mexicali, diin nagsugod sila sa pagbisita sang 1991 pagkatapos makabaton sang sulat halin sa isa ka priso didto. Sa interbyu sang mga Saksi, ang direktor sang Social Rehabilitation Center sa Mexicali, nga si Jesús Manuel López Moreno, nagsiling: “Ang pagkadto ninyo diri kag pag-ulikid sa [mga priso] nakabulig sa amon nga mapabakod sila sa pagsiling: ‘Mga tawo kami. May pulos man kami, magaabot ang tion nga makagua kami kag mangin maayo nga mga pumuluyo.’ . . . Nagapasalamat gid ako sa inyo padayon nga pagsuporta.”
Si Gamaliel Camarillo, nga humalambal sang mga Saksi ni Jehova sa Mexico nagsiling: “Ang panguna nga hilikuton sang mga Saksi ni Jehova amo ang pagbulig sa mga tawo, lakip ang mga priso, nga maintiendihan ang ginatudlo sang Biblia. Ang isa ka kongregasyon sa Mexicali nagreport nga indi magnubo sa walo ka tawo ang nabawtismuhan subong mga Saksi ni Jehova samtang ara pa sila sa prisuhan sa Mexicali. Nagapati kami nga ang tanan nga klase sang tawo dapat hatagan sing kahigayunan nga makabenepisyo sa edukasyon nga halin sa Biblia.”
Media Contact(s):
International: J. R. Brown, Office of Public Information, tel. +1 718 560 5000
Mexico: Gamaliel Camarillo, tel. +52 555 133 3048