Sang Oktubre 1, 2023, gin-release ni Brother Carlito Dela Cruz, miembro sang Branch Committee sa Micronesia, ang Bag-ong Kalibutan nga Badbad Sang Cristianong Griegong Kasulatan sa Chuukese. Ginpahibalo ini nga pag-release sa isa ka espesyal nga miting nga ginhiwat sa Chuuk, Micronesia, kag may 83 nga nag-attend sa sini nga programa. May 435 man nga nag-attend sa sini nga programa paagi sa videoconference, lakip ang mga kongregasyon nga nagahambal sang Chuukese kag mga group sa Guam kag sa United States. Pagkatapos sini nga release, puede na dayon ma download ang digital nga edisyon sini nga Biblia. Ang naimprinta nga edisyon mangin available sa Enero 2024.

Ang Chuukese ginahambal ilabi na sang mga tawo nga nagaistar sa mga isla sang Chuuk, nga ara sa western Pacific Ocean kag bahin sang Federated States of Micronesia. Ginsugdan sang mga Saksi ni Jehova ang pag-translate sang base sa Biblia nga mga publikasyon sa Chuukese sang 1978. Subong, mga 180 ka kauturan ang nagaalagad sa duha ka kongregasyon nga nagahambal sang Chuukese sa mga isla sang Chuuk. May isa ka kongregasyon sa isla sang Guam kag may isa ka kongregasyon, tatlo ka group kag isa ka pregroup sa United States.

Bisan pa may iban naman nga mga translation sang Biblia sa Chuukese, madamo sini ang wala naggamit sang ngalan sang Dios nga Jehova. Ginbalik sang Bag-ong Kalibutan nga Badbad Sang Cristianong Griegong Kasulatan ang ngalan sang Dios kon diin ini makita sa orihinal nga teksto. “Nagasalig ako nga ini nga translation sang Biblia magabulig sa madamo nga tawo nga nagahambal sang Chuukese nga matun-an ang ngalan ni Jehova kag mangin suod sa iya,” siling ni Brother Dela Cruz.

Nagakalipay kita sa pag-release sining Bag-ong Kalibutan nga Badbad Sang Cristianong Griegong Kasulatan sa Chuukese, nga makabulig sa madamo nga “may husto nga panimuot sa pagtigayon sing kabuhi nga wala sing katapusan” nga makatuon parte kay Jehova.—Binuhatan 13:48.