Sang Hunyo 18, 2023, ang Kompleto nga Bag-ong Kalibutan nga Badbad sang Balaan nga Kasulatan gin-release sa Changana (Mozambique). Gin-release ni Brother Charles Fonseca, miembro sang Branch Committee sang Mozambique, ang Biblia sa nagtambong nga 16,245 sa siudad sang Maputo, ang kapital sang Mozambique. Ang mga nagtambong nakabaton sang naimprinta nga mga kopya sang Biblia. May digital nga edisyon man nga puede ma-download.

Ang Changana (Mozambique) ginahambal sang halos 4.2 ka milyon ka tawo ilabi na sa duha ka probinsia sang Mozambique sa bagatnan, ang Maputo kag Gaza. Madamo sing dialekto ang Changana (Mozambique), gani gingamit sang translation team ang mga tinaga nga maintiendihan sang kalabanan nga nagahambal sang Changana (Mozambique) bisan diin man sila nagaistar.

Antes gin-release ang kompleto nga Biblia sa ila lenguahe, madamo sang mga manugbantala nga nagahambal sang Changana (Mozambique) ang nagagamit sang Biblia sa Tsonga, isa ka lenguahe nga kaanggid sa Changana (Mozambique). Bangod sini, nabudlayan ang iban nga tun-an ang kamatuoran sa Biblia. Ang isa ka translator nagsiling: “Paagi sini nga translation, ang mensahe sang Biblia makatandog sang tagipusuon sang mga nagahambal sang Changana (Mozambique).”

Ginpakita sang isa pa ka translator ang isa ka halimbawa nga mas maathag ang Bag-ong Kalibutan nga Badbad sa Changana (Mozambique). Nagsiling sia: “Sa iban nga lenguahe sa sini nga lugar, ang pila ka translation sang Biblia naggamit sang mga tinaga para sa ‘espiritu’ nga kon kaisa puede masal-an nga isa ka butang nga buhi gihapon bisan mapatay ang lawas. Pero ini nga tinaga sibu nga gin-translate sa Bag-ong Kalibutan nga Badbad sa Changana (Mozambique) paagi sa pagsiling nga ang ‘puersa sang kabuhi’ nagabalik sa Manunuga, indi ang persona mismo.”

Nalipay kita nga mahibaluan nga si Jehova ‘nagapadala sang iya kapawa kag kamatuoran’ samtang nagaathag pa gid ang iya Pulong sa mga nagahambal sang Changana (Mozambique) nga lenguahe.—Salmo 43:3.