Sang Abril 30, 2023, gin-release ang Bag-ong Kalibutan nga Badbad Sang Cristianong Griegong Kasulatan sa Gitonga nga lenguahe. Ginhimo ini paagi sa espesyal nga miting nga ginhiwat sa Maxixe, Inhambane Province, Mozambique. Gin-release ni Brother Wayne Wridgway, miembro sang Branch Committee sa Mozambique, ini nga Biblia sa 920 ka tumalambong. Ang mga nag-attend sa sini nga programa nakabaton sang naimprinta nga kopya sini nga Biblia. Puede man dayon ma-download ang digital nga pormat sini nga Biblia.

Ang Gitonga nga lenguahe ginahambal sa Inhambane Province sa Mozambique. Ang mga nagaistar sa sini nga lugar kilala sa ila pagkamaabiabihon kag kaalwan. Ang Gitonga nga lenguahe ginahambal sang mga 327,000 ka tawo halin sa sarisari nga rehiyon sa sini nga probinsia, pareho sang Homoíne, Jangamo, Maxixe, kag Morrumbene.

Sang una, nabudlayan gid ang mga kauturan mag-intiende sang Biblia nga na-translate sa Gitonga. Pero sa sining bag-o gin-release nga Biblia, nalipay gid ang aton mga kauturan kay may translation na nga maintiendihan nila. Ang isa ka translator nagsiling: “Ang isa ka mapinalanggaon nga amay, nagapakig-istorya sa iya mga bata paagi sa natural kag simple nga mga tinaga. Pareho man sa sini, mahapos na maintiendihan sang mga tawo nga nagahambal sang Gitonga ang ginasiling sang aton mapinalanggaon nga Amay nga si Jehova, paagi sa sini nga translation.”

Sang gin-release ni Brother Wridgway ini nga Biblia, sia nagsiling: “Kon gusto naton nga mangin suod sa Dios, dapat kita magpakig-istorya sa iya kada adlaw paagi sa pangamuyo. Pero, kinahanglan ta man sia pamatian kada adlaw paagi sa iya Pulong, ang Biblia. Ginapalig-on namon kamo nga basahon dayon ang inyo kopya sang Bag-ong Kalibutan nga Badbad Sang Cristianong Griegong Kasulatan kag himuon nga batasan nga basahon ang Biblia kada adlaw.”

Nagakalipay gid kita upod sa aton mga kauturan bangod sini nga release kag ginapangamuyo naton nga padayon nga pakamaayuhon ni Jehova ang pagbantala nga hilikuton sa mga tawo nga nagahambal sang Gitonga.—Roma 12:15.