Sang Abril 25, 2019, gindalasa sang Bagyo Kenneth ang naaminhan sang Mozambique. Amo ini ang ikaduha nga bagyo nga nag-igo sa pungsod pagkatapos nga nagwaswas ang Bagyo Idai sang Marso. Ang Bagyo Kenneth nagdala sing baha kag mga landslide nga nagguba sa mga puluy-an kag mga karsada, kag mas nagpabudlay pa gid sa mabudlay na nga daan nga sitwasyon didto.

Mga 300 ka manugbantala ang nagaistar sa probinsia sang Cabo Delgado, pero wala sa ila sing nasamaran ukon napatay bangod sa bagyo. Pero, 9 ka balay sang aton kauturan ang nawasak gid kag 16 ang may guba. Dugang pa, isa ka Kingdom Hall ang nawasak gid kag tatlo ang may guba. Ginduaw na sang manugtatap sang sirkito sa sina nga lugar, upod sa isa ka field representative sang Local Design/Construction, kag sa duha ka brother halin sa remote translation office ang tanan nga kongregasyon nga naapektuhan kag may ginhatag na nga kinahanglanon nga bulig.

Ginapangamuyo naton ang aton kauturan samtang padayon sila nga nagasalig nga pabakuron sila kag buligan ni Jehova “sa tion sang kalisdanan.”—Salmo 46:1.