Sang Hunyo 27, 2021, ginpagua ni Brother Adão Costa, miembro sang Branch Committee sa Mozambique, ang Bag-ong Kalibutan nga Badbad Sang Cristianong Griegong Kasulatan sa Nyungwe nga lenguahe. Ginrekord sing abanse ang programa kag gin-stream ini sa sobra 2,600 ka kauturan. Sa sini nga programa, ginpagua ang digital format sini nga Biblia. Ini nga programa, gin-broadcast man sa isa ka estasyon sang TV nga naga-broadcast sang programa sa bilog nga pungsod kag sa mga estasyon sang radyo.

• Ang Nyungwe amo ang panguna nga lenguahe sang mga tawo sa Tete Province sa aminhan-katundan sang Mozambique

• Mga 400,000 ka tawo ang nagahambal sing Nyungwe

• Natapos sang 6 ka translator ang pag-translate sini sa sulod sang 2 ka tuig

Si Brother Costa nagsiling: “Tinuig na nga wala sing Biblia sa Nyungwe nga lenguahe. Gani, Chichewa nga translation sang Biblia ang ginagamit sang mga kauturan nga nagahambal sing Nyungwe. Mabudlay gid ini kay madamo nga tinaga sa Chichewa ang indi nila maintiendihan.”

Antes ginpagua ang Biblia, ang isa ka miembro sang translation team nagsiling: “Sigurado nga matumbo gid sa kalipay ang mga kauturan. Madugay na nila ini nga ginahandum kag isa gid ini ka milagro halin kay Jehova. Sigurado nga magapasalamat gid sila sa iya.”

Ginapangamuyo naton nga kabay nga ini nga Biblia makabulig sa mga tawo nga gusto gid makabenepisyo sa mensahe sini.—Bugna 22:17.