Sang Nobiembre 4, 2019, ang duha ka sister nga sanday Tirtha Maya Ghale kag Pushpa Ghimire, nga ginsentensiahan sing tatlo ka bulan nga pagkapriso, ginpagua anay pagkatapos mapriso sing isa ka bulan. Ginpriso sila bangod lamang sang ila pagsimba sa Dios, nga isa ka kinamatarong nga ginaproteksionan sang kasuguan sa Nepal kag sang internasyonal nga kasuguan.

Isa ka tuig antes sini, si Sister Ghale kag si Sister Ghimire gin-aresto kay nagaistorya sila sa mga tawo nga interesado sa Biblia. Ginpriso sila sing 13 ka adlaw kag ginpabayad sang daku nga piansa­­—100,000 Nepalese rupee (mga $930 U.S.)—antes sila ginbuy-an. Pero ginapadayon gihapon sang mga awtoridad ang imbestigasyon batok sa ila.

Sang Disiembre 10, 2018, nagsugod ang pagbista sa mga sister kag naglawig ini sing mga pulo ka bulan. Sang Septiembre 25, 2019, ginsentensiahan sila sang Rupandehi District Court nga mapriso sing tatlo ka bulan kag ginmultahan sing 2,500 Nepalese rupee (mga $23 U.S.).

Ang district judge nagsiling nga nakasala ang mga sister bangod lamang nagadala sila kag nagapanagtag sang relihioso nga mga literatura. Ang Nepal miembro sang United Nations kag bahin sang International Covenant on Civil and Political Rights, gani may obligasyon ang gobierno nga siguraduhon nga ang mga pumuluyo may kahilwayan nga mag-ilis sang ila relihion kag ipakita ini, sa publiko man ukon sa pribado. Sanday Sister Ghale kag Sister Ghimire nagahatag sang mga publikasyon sa mga gusto lang magbaton, kag wala nila ginapilit ang mga tawo nga islan ang ila relihion. Bangod sini, ang ila mga abogado nag-apelar sa High Court sang Oktubre 31, 2019. Ang High Court nagsiling nga dapat paguaon sa prisuhan ang mga sister samtang nagahulat sang desisyon sang korte, gani ginpagua sila sa prisuhan.

Ginapangamuyo naton nga padayon nga hatagan ni Jehova sanday Sister Ghale kag Sister Ghimire sang iya balaan nga espiritu para may kabakod sila, kalipay, kag paghidait samtang nagahulat sang desisyon sang korte.—Roma 15:13.