Subong nga 2022, amo ang ika-100 ka tuig halin sang ginsugdan ang branch office sa Amsterdam, sa kapital nga siudad sang Netherlands. Sa sulod sina nga mga tinuig ginpakita sang aton mga kauturan didto ang mabakod nga pagtuo kag kaisog.

Ang maayong balita nakalab-ot sa Netherlands sang mga 1900, sang nabasa sang isa ka bataon nga lalaki nga si Heinrich Brinkhoff ang mga literatura nga ginhimo sang Watch Tower Society kag sang International Bible Students Association. Wala madugay, ginasugid na niya sa iban ang iya mga natun-an. Diri nagsugod ang pagtubo sang mga binhi sang kamatuoran. Sang 1920, nagbisita si Brother Joseph F. Rutherford sa Europe kag nagbukas sang branch office sa Switzerland. Ina nga branch office amo ang nagdumala sang mga hilikuton sa Netherlands. Sang 1921, gin-asayn ni Brother Rutherford si Brother Adriaan Block para magdumala sang hilikuton sa Netherlands. Sang 1922, ginbuksan ang branch office sa Amsterdam.

Bangod may branch office na, nangin mas organisado ang hilikuton. Padayon nga nagdamo ang mga alagad ni Jehova. Antes sang World War II, mga 500 na ang manugbantala sa pungsod.

Sang nagsugod ang inaway, ang Netherlands nasakop sang mga Nazi. Kag pareho sa iban nga mga grupo, ang mga Saksi ni Jehova ginpanikasugan gid nga hingabuton. Sa sini nga mga tion, mga 300 ka Dutch nga mga Saksi ang gin-deport kag madamo sa ila ang ginbutang sa mga concentration camp. Mga 130 ka kauturan naton ang napatay bangod sa balatian kag sa iban pa nga mga kabudlayan. Pero bisan pa ginhingabot sila, sang matapos ang inaway sang 1945, ang kadamuon sang mga Saksi ni Jehova sa Netherlands naglab-ot na sa 3,125.

Bisan natapos na ang inaway, may mga kabudlayan gihapon. Ginakontra sang Catholic Church ang mga Saksi, ilabi na sa south nga bahin sang pungsod. Halimbawa indi gid malipatan nga sang 1952, gintinguhaan sang Catholic Church nga pauntaton ang isa ka pagtinipon sa Venlo. Bangod sini, gin-cancel man ang kontrata para makagamit ang mga Saksi sang isa ka venue para sa kombension. Gani, nagpatindog sang tent ang mga kauturan sa isa ka open field kag didto ginhiwat ang kombension.

Pero wala gihapon nag-untat ang mga nagapamatok. May nag-abot nga sobra 1,000 ka tawo para gamuhon ang programa. Gin-raid man sang mga pulis ang convention site kag gin-aresto ang pila ka brother samtang ginahiwat ang sesyon sang Domingo sang hapon.

Wala gid nagmadinalag-on ang pagtinguha sang mga nagapamatok. Ginsunod sang nagapanguna nga mga brother ang direksion sang branch office kag nagpadayon ang kombension.

Ginpakamaayo gid ni Jehova ang katutom sang mga kauturan. Sang 1983, ang branch sa Netherlands ginsaylo sa isa ka bag-o nga pasilidad sa Emmen. Sang 2022, halos 30,000 na ang mga Saksi ni Jehova sa Netherlands.

Ang kasaysayan sang mga Saksi ni Jehova sa Netherlands nagapakita nga ‘indi gid pagbayaan ukon pagpabay-an’ ni Jehova ang iya katawhan.—Deuteronomio 31:6.