Sang Marso 2022, ika-75 ka tuig na sugod sang narehistro ang mga Saksi ni Jehova sa New Zealand. Sang Marso 7, 1947, si Brother Nathan H. Knorr, si Brother Milton Henschel, kag ang una nga misyonero sa New Zealand nga nag-eskwela sa Gilead nga si Brother Charles Clayton, nagbisita sa Parliament sang New Zealand. Ginhatagan sang mga opisyal sang gobierno ang mga utod sang mga papeles nga nagapamatuod nga narehistro na ang mga Saksi ni Jehova sa pungsod. Subong, nagapadayon ang pagbantala, kag may mga 14,500 ka manugbantala sa sini nga pungsod.

Ang mensahe sang Ginharian nakalab-ot sa New Zealand sang 1898. Sugod sadto, padayon nga nagdamo ang mga manugbantala. Naakig ang Catholic Church kay ginasugid sang aton mga literatura ang kamatuoran halin sa Biblia, gani ginsulsulan nila ang mga tawo para maakig sa mga Saksi ni Jehova. Sang Oktubre 24, 1940, gin-ban sang gobierno ang aton hilikuton. Pero sang Mayo 8, 1941, gin-amiendahan sang Parliament ang pag-ban, kag makatipon na ang mga kauturan kag makabantala. Pero Biblia lang ang puede nila gamiton, indi ang aton literatura. Sang Marso 29, 1945, gindula sang gobierno ang ban, kag nagdamo liwat ang mga manugbantala. Duha lang ka tuig sang ulihi, 40 porsiento ang pagdamo sang mga manugbantala sang Ginharian, kag 659 na ka mga kauturan ang nagabantala sang maayong balita.

Sang 1947, nagkadto si Brother Knorr sa New Zealand kay lakip ini sa iya ruta nga magbantala sa bilog nga kalibutan. Sini nga tion nga ginbisitahan niya ang Parliament.

Pagkatapos nga nakuha ang rehistro, gintukod ang isa ka branch office sa Wellington para organisahon sing maayo ang hilikuton. Si Brother Robert Lazenby amo ang gin-asayn nga mangin una nga branch servant.

Parte sa bag-o nga branch office kag sa pagdamo sang manugbantala, si Brother Knorr nagreport parte sa New Zealand: “Gusto gid sang tanan nga magbulig sa bisan ano nga hilikuton nga kinahanglan para suportahan ang branch kag ginasunod gid nila ang direksion sini.”

Sang Marso 8-9, 1947, si Brother Knorr kag si Brother Henschel nag-talk sa isa ka espesyal nga asembleya nga ginhiwat sa Wellington Town Hall, kag ang sesyon sini sa hapon ginhiwat sa malapit nga technical college. Mga 500 ka kauturan ang nagtambong.

Si Sister Beryl Todd, nga mga 17 anyos sadto, nagsiling: “Amo ato ang pinakadaku nga assembly nga natambungan ko, kag nalipay gid ako nga ato didto sa Brother Knorr.” Nabawtismuhan sina nga adlaw sa swimming pool si Clyde Canty, nga nangin koordenitor sang ulihi sang branch sa New Zealand.

Sang Marso 10, 1947, dugang pa nga 300 ka tawo ang nagtipon sa Auckland para mamati sa talk ni Brother Knorr, ni Brother Henschel, kag ni Brother Lazenby. Nagreport si Brother Knorr nga nakita niya nga posible gid nga magdamo ang manugbantala sa New Zealand. “Sigurado gid ako nga magauswag ang hilikuton diri,” siling niya. “Daku gid ang potensial sa sini nga teritoryo.”

Nangin matuod gid ang ginsiling ni Brother Knorr. Sang masunod nga walo ka tuig, naga-average sing 18 porsiento kada tuig ang pag-uswag. Sang 1955, may 2,519 na ka manugbantala. Kag sang 1989, nakalab-ot na ang manugbantala sa 10,000.

Nalipay kita nga ginabuligan ni Jehova ang aton mga kauturan sa ila legal nga pagpamatuod sang maayong balita sa New Zealand.—Filipos 1:7.