Sa duha ka sunod nga weekend, gin-release sang mga miembro sang Branch Committee sang Nigeria ang Bag-ong Kalibutan nga Badbad Sang Cristianong Griegong Kasulatan sa duha ka lenguahe didto. Ini nga pag-release ginhimo sa tion sang 2023 nga “Mangin Mapinasensiahon”! nga Rehiyonal nga Kombension sa Benin City kag Agbor, Nigeria. Sang Disiembre 8, 2023, gin-release ni Brother Archibong Ebiti ang Cristianong Griegong Kasulatan sa Edo. Dayon, sang Disiembre 15, 2023, gin-release man ini ni Brother Malcolm Hall sa Esan. Ginpanagtag ang naimprinta nga mga kopya sa mga nag-attend sa sining duha ka programa. Puede naman ma-download ang digital kag audio nga pormat sini nga Biblia.

May 1,678 nga nag-attend sa pag-release sang Cristianong Griegong Kasulatan sa Edo. Ginabanta nga duha ka milyon ka tawo ang nagahambal sang Edo sa bilog nga kalibutan. Sobra 900 ka kauturan ang nagahambal sang Edo nga nagaalagad sa 23 ka kongregasyon sa Nigeria. Nagsugod sa pag-translate ang Edo translation team sing sigesige sang 2014. Sina man nga tuig, ang mga publikasyon sa sina nga lenguahe nangin available man sa aton website, nga jw.org.

Bisan may ara man sang iban nga translation sang Biblia sa Edo, mabudlay ini pangitaon kag mahal ini. Madamo sini nga mga translation ang wala naggamit sang ngalan ni Jehova kag daan na kaayo ang lenguahe. Gani, mabudlay para sa mga tawo nga nagahambal sang Edo nga maintiendihan ang mensahe sang Biblia. Si Sister Patience Izevbuwa, nga 74 anyos kag nagaalagad kay Jehova sing sobra na 50 ka tuig, nagsiling: “Nalipay gid ako nga may Bag-ong Kalibutan nga Badbad Sang Cristianong Griegong Kasulatan na sa Edo. Indi gid matupungan ang akon kalipay!”

Sobra 692 ka tawo ang nag-attend sa pag-release sang Cristianong Griegong Kasulatan sa Esan. Sobra isa ka milyon ka tawo ang nagahambal sang Esan sa Nigeria. Subong, may 640 ka kauturan nga nagahambal sang Esan sa pulo ka kongregasyon sa pungsod.

Amo ini ang una nga kompleto nga translation sang Cristianong Griegong Kasulatan nga gin-release sa Esan nga lenguahe. Antes sini nga release, ang madamo naton nga kauturan nga nagahambal sang Esan nagagamit sang Bag-ong Kalibutan nga Badbad Sang Cristianong Griegong Kasulatan sa English. Ang isa ka sister nagkomento parte sa ekspresyon nga “sini nga bahandi sa mga suludlan nga daga” sa 2 Corinto 4:7. Sia nagsiling: “Nadumduman ko nga sang ginbasa ko ini sa English, indi ko ini maintiendihan. Pero, amo ini ang pag-translate sang Bag-ong Kalibutan nga Badbad sa Esan: ‘Bisan pa nga daw mga suludlan kita nga daga, ginhatagan kita sang Dios sining importante nga ministeryo.’ Subong, naintiendihan ko na ang buot silingon sini kag natandog gid ang akon tagipusuon. Kanami gid sini nga regalo!”

Nagakalipay gid kita para sa aton mga kauturan nga ngahambal sang Edo kag Esan sa pag-release sang Bag-ong Kalibutan nga Badbad Sang Cristianong Griegong Kasulatan sa sining duha ka lenguahe kag ginapangamuyo naton nga makabulig ini sa mas madamo pa nga tawo nga makatuon sang “sibu nga ihibalo tuhoy sa kamatuoran.”—1 Timoteo 2:3, 4.