Sang Pebrero 12, 2023, gin-release ni Brother Jeffrey Winder, miembro sang Nagadumala nga Hubon, ang Bag-ong Kalibutan nga Badbad Sang Cristianong Griegong Kasulatan sa Pidgin (West Africa) kag sa Urhobo nga mga lenguahe. May 559,326 ka tawo ang nagtan-aw sang programa sa Nigeria, nga gin-stream sa mga kongregasyon. Nangin available dayon ang digital nga kopya sini nga Biblia pagkatapos sang programa sa pag-release. Ang naimprinta nga kopya mangin available sa katapusan nga mga binulan sang 2023.

Ang una nga kongregasyon nga nagahambal sang Pidgin (West Africa) naporma sang 2015. May ara na subong sobra 1,100 ka kongregasyon sa Nigeria kag madamo man sang Pidgin (West Africa) nga kongregasyon sa iban nga mga pungsod, pareho sa England kag sa United States. Sang una, English lang nga Bag-ong Kalibutan nga Badbad sang Balaan nga Kasulatan ang ginagamit sang mga kongregasyon. Ang isa ka brother nagsiling: “Sang una, kasaw-a nga naga-preaching ka sa Pidgin, pero English nga Biblia ang ginabasa mo. Kon kaisa, indi maintiendihan sang tagbalay ang punto nga amon ginabasa. Subong, naga-preaching kami sa Pidgin kag nagabasa man sang Biblia sa Pidgin. Bangod ginabasa namon ang Biblia sa lenguahe gid mismo sang tagbalay, mas maintiendihan na nila ang amon mensahe.”

Ang una nga kongregasyon nga nagahambal sang Urhobo naporma sang 1933. Sang 1968, gin-translate sang aton mga kauturan ang una nga booklet nga Living in Hope of a Righteous New World, sa Urhobo. Sugod sadto, ang kadamuon sang kongregasyon nga nagahambal sang Urhobo naglab-ot na sa 103. Mangin daku gid nga bulig sa mga kongregasyon ang pag-release sang Bag-ong Kalibutan nga Badbad Sang Cristianong Griegong Kasulatan sa Urhobo kay natural ini kag mahapos basahon.

Ginapangamuyo naton nga ini nga translation magabulig sa madamo pa nga ‘mapuno sing sibu nga ihibalo’ sang Dios.—Colosas 1:9.