Sining karon lang, ginbuksan sa branch sa Nigeria ang duha ka bag-o nga Bible training facility. Ining mga bilding gamiton ilabi na sang mga estudyante sang School for Kingdom Evangelizers (SKE). Sang Pebrero 2023, ginhiwat ang una nga klase sa Uli, Nigeria. Sang Hunyo 2, 2023, nag-umpisa ang una nga klase sa Ibadan, Nigeria. Ining duha ka pasilidad gamiton man sa School for Circuit Overseers and Their Wives.

Ang ginpatindugan sang mga pasilidad mga Assembly Hall sang una kag subong may ara na ini sang classroom, library, kag mga dalayunan para sa mga estudyante. Kada tuig, sobra 500 ka kauturan ang naga-apply para sa SKE sa Nigeria. Gani, ginapaabot nga ang kada pasilidad makahiwat sang apat ka klase kada tuig. Ang mga klase hiwaton sa English, Igbo, Pidgin (West Africa), kag Yoruba nga lenguahe.

Sa isa ka sulat sa ila pagpasalamat, ang bag-o lang nag-graduate nga klase sang SKE sa Uli nagsiling nga malinong kag komportable gid ang pasilidad. Nagsiling sila: “Malinong gid ang lugar kag komportable ang mga kuarto gani mas makapokus kami sa amon ginatun-an kag nanamian gid kami diri. Ang maayo nga halimbawa sang mga nagaalagad kag mga volunteer sa pasilidad, nga mapisan nga nagahatag sang amon mga kinahanglanon, nagpabatyag sa amon nga palangga gid nila kami.”

Nagasalig kami nga ining bag-o gintukod nga mga training facility makabulig sa aton mga kauturan sa Nigeria nga ‘matuman sing bug-os ang ila ministeryo.’—2 Timoteo 4:5.