Ang mga Saksi ni Jehova sa Nigeria naghiwat sining karon lang sang duha ka pinasahi nga okasyon para iselebrar ang 100 ka tuig nga pagpanudlo sang Biblia didto. Sang Disiembre 12, 2021, ang tanan nga kongregasyon sang mga Saksi ni Jehova sa Nigeria gin-agda para magtan-aw sang narekord na nga daan nga programa. May ara ini mga pamulongpulong kag mga interbyu parte sa kasaysayan sang pagbantala sa sini nga pungsod. Ang programa gin-stream sa mga tumalambong sa Efik, English, Igbo, Nigerian Sign Language, Pidgin (West Africa), kag Yoruba nga mga lenguahe. Antes sini, sang Disiembre 10, 2021, ginbuksan nila sa ila branch office ang isa ka pinasahi nga museum. Subong, ang eksibit sa sini nga museum bukas para sa mga nagaalagad sa branch sa Nigeria, pero sa ulihi buksan ini para sa mga bisita.

Ang eksibit natig-uluhan “100 Years of Courage.” Nagasugid ini sang makakulunyag nga istorya sang maisog nga pagpanaksi kag mabakod nga pagtuo sang mga Saksi ni Jehova sa Nigeria. Ginhimo nila ini bisan pa gindumilian ang ila publikasyon, ginyaguta sila sang mga tawo, kag bisan pa naeksperiensiahan nila ang isa ka mapintas nga civil war. Ang audio kag video nga mga rekording kag ang nadispley nga mga kagamitan nakabulig sa mga bisita nga maimadyin ang kabuhi sang mga kauturan sadto. Makita man sang mga bisita kon paano nag-uswag ang hilikuton sa Nigeria. Ginapakita ang mga hitabo halin sang Disiembre 1921, sang may pila lang ka interesado nga nagtambong sa mga grupo nga pagtuon sa Biblia sa Lagos, asta subong, nga sobra 400,000 ka manugbantala ang naga-preaching sa bilog nga pungsod.

Ang mga Saksi sa Nigeria kag sa bilog nga kalibutan mangin maisog man kon binagbinagon nila ang halimbawa sa katutom sang mga kauturan sa Nigeria sang nagligad nga 100 ka tuig.—Juan 16:33.