Nag-organisar ang branch sa North Macedonia sang isa ka pinasahi nga kampanya sa pagbantala sugod sang Agosto 1 asta Oktubre 31, 2019, para mabantalaan ang mga tawo nga nagahambal sang Macedonian ukon Albanian sa teritoryo sang ila branch.

Sa North Macedonia, sobra 1.3 ka milyon ang nagahambal sang Macedonian kag sobra tunga sa milyon ang nagahambal sang Albanian. Pero sa 1,300 ka manugbantala sa pungsod, mga 1,000 ka manugbantala ang nagaalagad sa mga teritoryo nga nagahambal sang Macedonian kag 20 lang ang nagasuporta sa mga teritoryo nga nagahambal sang Albanian. Para mabuligan ang mga manugbantala sa North Macedonia, 476 ang nagboluntaryo halin sa pito ka pungsod—Albania, Austria, Belgium, Germany, Italy, Sweden, kag Switzerland.

Sa tion sang kampanya, ang isa naton ka utod may nasugata nga bakero sa dalan. Sang nabal-an sang bakero nga ang iya ginaistorya isa sa mga Saksi ni Jehova, ginkuha niya sa iya bag ang Ginatudlo sang Biblia nga libro. Ginsugid niya nga ini nga libro ginhatag sa iya sang mga Saksi nga taga-Italy sang nagkadto sila para sa pinasahi nga kampanya sa pagbantala pulo ka tuig na ang nagligad. Nagsiling sia nga ginabasa niya ang Ginatudlo sang Biblia nga libro adlaw-adlaw kag saulado na gani niya ang pila ka kapitulo. Gin-iskedyul sang mga brother nga mabalikan sia.

Ang pagsuporta sang madamo nga kauturan nga nagahambal sang Macedonian kag Albanian nagapahanumdom sa aton sang kahanda ni Pablo sa pagbaton sang iya asaynment nga ‘magtabok sa Macedonia.’—Binuhatan 16:9.