Sang Marso 4, 2024, ginsuportahan sang Oslo District Court ang desisyon sang gobierno nga indi pagbatunon ang legal nga rehistro sang mga Saksi ni Jehova sa Norway. Iapelar sang mga Saksi ni Jehova sa Norway ang desisyon.

Wala ginbaton sang County Governor sang Oslo kag Viken ang rehistro sang katapusan sang 2022. Temporaryo nga gin-suspend ini sang Oslo District Court sang Disiembre 30, 2022, samtang ginapadayon pa ang imbestigasyon. Indi gihapon paghatagan sang legal nga pagkilala ang mga Saksi ni Jehova sa pungsod sang Norway kon wala kita sang himuon nga pagbag-o parte sa pag-disfellowship sang nakasala nga wala nagahinulsol sa kongregasyon.

Bangod sang desisyon nga indi pag-irehistro ang mga Saksi ni Jehova, indi kita makabaton sang pinansial nga bulig kag iban pa nga mga benepisyo halin sa gobierno nga ginahatag sa sobra 700 ka relihion nga narehistro sa pungsod. Dugang pa, wala na kita sang kinamatarong nga magtangdo kag mag-authorize sa mga ministro sang mga Saksi ni Jehova bilang mga manugkasal.

Samtang ginahulat naton ang resulta sang pag-apelar, magapadayon kita sa pagpangamuyo “para sa mga hari kag sa tanan nga may mataas nga posisyon, agod magkabuhi kita sing matawhay kag malinong nga may bug-os nga diosnon nga debosyon.”—1 Timoteo 2:1, 2.