Sang Disiembre 30, 2022, nagsugot ang Oslo District Court sa pangabay sang aton mga kauturan nga maghatag sang temporary injunction para untaton ang pagtinguha sang gobierno nga kuhaon ang rehistro sang mga Saksi ni Jehova bilang isa ka relihion sa Norway. Kinahanglan ini bangod ginpahibalo sang County Governor sang Oslo kag Viken ang iya desisyon nga ikanselar ang aton rehistro sa pungsod. Sa bulig sang injunction, indi kita makuhaan sang rehistro asta mabinagbinag sang korte ini nga kaso. Ang Ministry of Children and Families wala nagaugyon sa sini nga injunction.

Nakabenepisyo gid ang aton mga kauturan sa injunction nga ginhatag sang district court, labi na gid ang mga naganobyahanay. Sa Norway, ang ginahatagan lang sang lisensia sang gobierno para magpangkasal amo ang mga miembro sang isa ka rehistrado nga relihion. Sang ginpahibalo sang gobierno nga kuhaan sang rehistro ang mga Saksi ni Jehova, buot silingon nga ang mga manugkasal nga Saksi, madulaan man sang lisensia. Pero bangod sang injunction, ang mga magnobyahanay puede gihapon makasal sa ila Kingdom Hall kag isa ka Saksi ni Jehova ang magakasal sa ila.

Ang magnobyahanay nga si Brother André Bjørnstad kag si Sister Yasmin de Andrade Montelo isa sa mga naapektuhan sini. Ang ila ginsiling ginlakip sa injunction nga gin-file sang Disiembre 28, 2022. Kabalo si Brother Bjørnstad nga siguro natingala gid ang iban kon ngaa gusto gid nila sang iya nobya nga isa gid sa mga Saksi ni Jehova ang makasal sa ila. Sia nagsiling: “Importante gid para sa mga tawo ang ila pagtuluuhan kag mga ginapatihan. Kon wala ina ginarespeto, daw pareho lang nga nadula ang isa ka bahin sang imo pagkatawo.”

Antes sang desisyon sang gobierno sang Norway nga kuhaan sang rehistro ang mga Saksi ni Jehova, ginkuha na sang gobierno ang aton kinamatarong nga makabaton sang kuarta halin sa gobierno, nga ginabaton naton sa sulod sang sobra na 30 ka tuig. Ining pinansial nga bulig ginahatag sang gobierno sa sobra 700 ka narehistro nga relihion sa bilog nga pungsod. Sang Disiembre 21, 2022, ang mga Saksi ni Jehova nagpasaka sang kaso kontra sa gobierno sang Norway para bag-uhon sang gobierno ang ila desisyon.

Indi komporme ang gobierno sang Norway sa aton base sa Biblia nga pagpati kag mga ginahimo parte sa pag-disfellowship. Naglab-ot pa gani sa punto nga gusto sang governor nga bag-uhon sang mga Saksi ni Jehova ang ila mga ginapatuman parte sa pag-disfellowship para indi pagkuhaon ang ila rehistro. Ini nga mga pagpamatok sa mga Saksi ni Jehova wala nabase sa opinyon sang mga eksperto ukon sa desisyon sang korte.

Nagsiling ang governor nga ang pagkuha sang rehistro wala nagapugong sa kahilwayan sa relihion. Pero sa pareho sini nga mga kaso nga indi man pag-irehistro sang iban nga gobierno ang aton organisasyon, nagdesisyon ang European Court of Human Rights nga isa ini ka paglapas sa kahilwayan sa relihion sang mga Saksi ni Jehova. a

Si Brother Jørgen Pedersen nga miembro sang Branch Committee sang Scandinavia, nagsiling: “Ang mga Saksi ni Jehova sa Norway nagahimo sang ila pagsimba sa sulod na sang sobra 130 ka tuig. Ang aton panguna nga kinamatarong kag kahilwayan ginaproteksionan sang Norwegian Constitution kag sang European Convention on Human Rights. Kon magdesisyon ang korte sa Norway pabor sa aton, mas magaamlig ini sa kinamatarong kag kahilwayan sang tanan nga citizen sang Norway.”