Sugod pa sang 1919, may mga Saksi ni Jehova na sa ginatawag subong nga Palestinian Territories. Sang 1920, naghimo sila sang kongregasyon sa Ramallah, kag sang 1942, naghimo sila sang ikaduha nga kongregasyon malapit sa Betlehem. Bangod sang Palestinian war sang 1948, natunga ang rehiyon: Ang isa ka bahin amo ang nangin bag-o nga pungsod sang Israel, kag ang isa amo ang bahin nga nangin kontrolado sang Jordan. Sa sulod sang halos 20 ka tuig, wala sang komunikasyon ang mga Saksi sa Israel kag sa Palestinian Territories. Pagkatapos sang Six-Day War sang 1967, nagbalik ang komunikasyon, kag nakatipon na liwat kag nakahimo sang ila mga hilikuton ang mga Saksi sa West Bank.

Bisan pa ginatinguhaan sang mga Saksi ni Jehova nga makaparehistro, gina-deny sang mga awtoridad ang ila aplikasyon. Makatipon gihapon ang mga Saksi para magsimba kag masugid nila ang ila ginapatihan sa iban. Pero bangod wala sila narehistro, wala ginahatag sa ila ang ila kinamatarong bilang citizen. Padayon nila nga ginatinguhaan nga marehistro kag mabaton ang ila panguna nga mga kinamatarong.