Halin sang Pebrero 28 asta Marso 10, 2024, ginhiwat ang book fair nga ginatawag Libroferia Capel sa Asunción, Paraguay. Ginahiwat ini kada tuig. Ginabanta nga may 10,000 ka tawo nga nanamian magbasa sang libro nga sarisari ang edad ang naga-attend sa sini nga event kada tuig. Sobra 160 ka kauturan ang nagbulosbulos bantay sang booth nga naga-display sang Pulong sang Dios kag sarisari nga publikasyon nga ginagamit para tun-an ang Biblia nga available sa jw.org. Makita man diri ang digital kag naimprinta nga pormat sang mga publikasyon sa Guarani, Paraguayan Sign Language, kag Spanish nga mga lenguahe.

May isa ka lalaki nga nagpalapit sa booth sang nakita niya ang isa ka sign nga naga-advertise sang libre nga pagtuon sa Biblia. Ginpaathag sang mga utod kon paano ginahimo ang aton pag-Bible study kag ginpakita nila sa lalaki ang Magkabuhi sing Wala Katapusan! nga brosyur. Pagkatapos niya mabasa ang kaundan sini, sia nagsiling: “Wala gid ako kabalo nga masabat gali sang Biblia ining tanan nga pamangkot!” Nalipay man sia nga mabal-an ang personal nga ngalan sang Dios nga Jehova. May ginhimo nga kahimusan para makontak sia kag masugdan ang pag-Bible study sa iya.

May isa man ka lalaki nga nagpakig-istorya sa isa sa mga sister sa booth. Nagsiling sia nga nalipay gid sia nga makakita sang sarisari nga impormasyon nga available sa aton website sa Guarani, Guaraní (Mbyá), kag Nivaclé nga mga lenguahe. Ginpasalamatan niya ang mga Saksi ni Jehova sa ila mga panikasog nga ma-translate ang base sa Biblia nga mga publikasyon sa sarisari nga nitibo nga mga lenguahe.

Si Brother Daniele Sarcone, nga nagbulig para ma-organisar ang mga boluntaryo, nagsiling: “Nalipay gid kami kay madamo kami sang naistorya nga interesado magtuon sing dugang parte sa Biblia.” Sa sini nga event, may mga 13 ka tawo nga namangkot kon paano sila makatuon sa Biblia.

Nalipay gid kita nga mabal-an nga padayon ang pagpanaksi sa Paraguay samtang mas madamo pa nga tawo ang dapat makabati sang kamatuoran.—Salmo 119:160.